فيديو| مصطفى بكري: أقول للناس “بتوع الساحل” بطلوا استفزاز في الناس والطبقات الفقيرة.. بلاش تستفزونا بمظاهر حياتكم

كتب- درب 

قال الصحفي مصطفى بكري، عضو مجلس النواب، إن مصر فيها غلاء أسعار، وهناك “من يمص دم الشعب”، وفي الوقت نفسه يتم استفزاز الطبقات الفقيرة وتحديدا من “الناس بتوع الساحل”. 

وأضاف بكري، خلال برنامج “حقائق وأسرار”: “في زيادة في الأسعار وفي ناس بتمص دم الشعب المصري، وبتوع الساحل بيستفزوا الناس، اللي بيحصل في الساحل ومظاهر عمرنا ما شفناها في أي عهد أو زمن، دي ناس ناسيه أن أغلبيتنا ناس تعبانة وبيستفزونا، أنتم بتعملوا حالة استفزاز طبقي في المجتمع وبقول للناس في الساحل الشمالي ريحوا شوية”. 

وقال: “أنا شوفت فيديو لأخ خليجي بيتكلم عن السيارات اللي موجودة في العلمين، والله ولا كأننا دولة عندها فائض كبير، بتشتري سيارة بـ 8 مليون ماشي بس بلاش تستفز الناس، نرجوا من إخوانا بتوع دولة الساحل الشمالي يبطلوا يستفزونا”. 

وأكمل: “الناس عايزة الستر، محدش عايز يبقى باشا، شوفلنا حل في أسعار المياه والكهرباء اللي طالعة نازلة”، مردفًا: “نتمنى أن يحدث استجواب في مجلس النواب الفترة المقبلة، كما يجب على الإعلام أن يواجه التشكيك”. 

وواصل، قائلًا: “أتمنى أن يكون أول قانون ينظره مجلس النواب في أكتوبر المقبل، هو اشتراطات البناء، فيه ناس تعبانة وشقيانة ومش لاقية، لازم أحطها في أولوياتي”.