فيديو| عمرو أديب ينصح علي عبدالعال بعد تغيبه عن البرلمان: لازم نتعلم تداول السلطة.. النهارده رئيس بكره عضو.. السياسة كده

أديب: هو يا إما أبقى رئيس مجلس يا مشتغلش؟ ترامب لما اختاروا غيره مزعلش ليه.. وعندنا نموذج اسمه الرئيس عدلي منصور

كتب- فارس فكري

نصح الإعلامي عمرو أديب، النائب على عبد العال بالعودة لحضور جلسات البرلمان بعد تغيبه منذ اختيار رئيس جديد لمجلس النواب، وقال أديب أنا من الشخصيات التي تُحب أن تكون مصر بها حياة سياسية دائمًا، مشيرا إلى أنه قرأ حوارًا للكاتب والإعلامي وعضو مجلس النواب مصطفى بكري يتحدث عن الدكتور علي عبد العال رئيس مجلس النواب السابق، والعضو الحالي، بأن عبد العال حزين «شايف إن ملهوش مكان في المجلس، هو عضو مجلس حالي بس قاعد في البيت».

وأضاف «أديب»، خلال تقديمه برنامج «الحكاية»، على شاشة «mbc مصر»، أن عبد العال لم يذهب للمجلس بعد أدائه اليمين كعضو، «عاوز أقول للدكتور علي دي اختيارات، لو احنا بنتكلم عن حياة سياسية لازم نتعود على مثل هذه الأمور، في عهد عبد العال تم إقرار أكثر من 500 قانون، وعمل مجهود كبير وخدم البلد، ده خدم البلد بشكل تاريخي».

واستنكر الإعلامي، غضب عبد العال، قائلًا : «يعني هو أبقى رئيس المجلس أو مشتغلش؟، عبد العال لا يأتي للمجلس، وبيقولوا إنه قرر ألا يأخذ راتبه؟ يعني هي مسألة وجود حضرتك في المجلس واقفة على الراتب؟ إنت عضو وليك دور ولازم نتعلم تداول السلطة، أنا عايز أسألك سؤال يا دكتور علي هو دونالد ترامب، رئيس الولايات المتحدة الأمريكية لما اختاروا غيره مزعلش ليه؟، وكتب اليوم يبدأ عملي من جديد».

وأوضح الإعلامي، أنه يجب التعود على مثل هذه الأمور من أجل حياة سياسية جيدة، «النهاردة واحد رئيس لجنة بكرة يبقى عضو عادي في اللجنة، النهاردة يبقى رئيس مجلس بعد كدة يبقى عضو، دي حاجة سياسية، لو حضرتك تعتقد أنك أديت دورك في الخمس سنوات الماضية وتريد الاهتمامك بدراساتك القانونية أو الاهتمام بأسرتك لا تكن في هذا المجال».

وتابع: «إحنا بلد غلبانة ومحتاجة شغل، محتاجين من الـ 600 عضو كل واحد يشتغل، الدكتور علي عبد العال قامة كبيرة، نحترمها ونقدرها بس لازم يفهم أن فيه حاجة اسمها حياة سياسية، يقوم ويسأل ويراقب، أدخل مع الناس دي وأدخل معاهم أنت خبرة قانونية، لازم تبقى موجود ونستشيرك ونتعلم منك، تعرف الجدد يقدموا طلبات إحاطة واستجواب إزاي».

وواصل: «مينفعش كل واحد يبقى في منصب ولما ييجي يسيبه يزعل، ويقول أنا أبقى رئيس المجلس أو لأ، إحنا موجودين في البلد عشان البلد، أنا مش بنزل اجي البرنامج عشان الفلوس والأرزاق وكده، الفلوس ممكن تتعمل في مليون حته تانية ومليون مجال، بس لازم البلد تفهم معنى الحياة السياسية، ممكن حزب الأغلبية بكرة ميبقاش أغلبية».

وتابع: «ممكن رئيس حزب بعد فترة يبقى مجرد عضو، وإلا سيكون هناك حالة من اليأس عند الناس من أن الحياة لا تتغير ولا يوجد تغيير، ولسبب أو آخر رؤي أن الدكتور علي ميبقاش رئيس المجلس الجديد وهذا شيئ جيد، والبلد مليانة كفاءات، وهناك سؤال دايما يجنني نجيب مين؟، مصر مليانة بشر وناس كفاءات عاوزة تخدم، الدكتور علي عبد العال لا محتاج دخل ولا منظرة من المجلس، ده قامة يستطيع أن يفعل ما يريد في أي مكان، أنا مش بتكلم عن الدكتور علي عبد العال بالتحديد، أنا بتحدث فقط عن المبدأ».

وأضاف إحنا عندنا نموذج نرفع له القبعة في تداول السلطة الرئيس عدلي منصور نرفع له القبعة لأنه رجل جاء في وقت حساس جدا خلص دوره والآن موجود للنصيحة، وتظل دائما تحترم عدلي منصور وهذه هي الحياة السياسية إلا إذا كنا عايزين الدنيا زي ما هي لا تغيير ولا حاجة، أتمنى أن تكون موجود في المجلس يا دكتور علي وأتمنى على الأحزاب أن تدق باب الدكتور علي عبد العال وتقول له إحنا محتاجينك.