شيرين وحسام يطفئان «أزمة التسريبات».. الفنانة: بيحبني أكتر من نفسه وحاسة معاه بالأمان.. وزوجها: قادر أجيب حقنا بالقانون (فيديو)
شيرين عبد الوهاب: حسام بنالي شخصيتي في وقت كنت مدمرة فيه ورجعلي لنفسي تاني وبقيت بقدر أتكلم ومكنتش منتظرة كمية القسوة دي
حسام حبيب: تزوجت شيرين وهى أنجح واحدة في الوطن العربى ولا تحتاج لأحد ومش من حق أي حد إنه يتدخل في العلاقة بينا
كتب: عبد الرحمن بدر
أطفأ الفنان حسام حبيب وزوجته الفنانة شيرين عبد الوهاب أزمة التسريبات، بعد تصدرهما تريندات مواقع التواصل الاجتماعي خلال الساعات الماضية، بعد أزمة التسريب المنسوب لوالد حسام حبيب، والذي تحدث فيه عن كثير من التفاصيل عن علاقة الفنانة بابنه وبزوجته.
وبعد انتشار التسريب دافع مستخدمو مواقع التواصل عن شيرين، وطالبوا بالكف عن العنصريه تجاهها، خاصة وأنه من أهم الفنانات المصريات في العقدين الأخيرين.
وخرجت شيرين في مقطع مصور لترد على حماها وتدافع عن علاقتها بزوجها، وقالت شيرين عبد الوهاب إنها بخير ولا يوجد أي خطر على حياتها، مضيفة: “حسام حبيب جوزي اللي أنا معاشراه، ومن أنضف رجال الدنيا، وبيحبني أكتر من نفسه، وأنا مديه للناس العذر عشان ميعرفهوش”.
وتابعت شيرين: “حسام بنالي شخصيتي في وقت كنت مدمرة فيه ورجعلي لنفسي تاني وبقيت بقدر أتكلم، ومكنتش منتظرة كمية القسوة دي، وحسام بيحبني جدًا، وبيعشق بناتي، ولم يستفيد بأي شيء مني، ومعايا عشان يحميني أنا وبناتي”.
وأضافت الفنانة: “حماتي ست عظيمة، وحسام رجل نقي ونضيف ربنا بعتهولي، وأدعولنا بالذرية الصالحة”.
وقالت شيرين في الجزء الثانى من التسجيل: “الفيزا بتاعتى مش معاه وكل الكلام مش مظبوط لأنى كلى كده بتاعته، زوجى راجل من عيلة وعيلة محترمة أوى ومقبلش أن حد يكلم عليه كده ولا هو ولا والدته وحسام راجل مفيش زيه، بقالنا 4 سنوات متجوزين ولو كان عاوز يستفيد منى كان عامل أغنية سينجل، وكل الناس بتختلف وبتتخانق عادى وحسام بيحبنى وحاسة معاه بالأمان كفاية أنه طلع من حياتى كل الناس اللى بتستغلنى وطلع كل الثعابين والحاجات الفاسدة”.
كما حرص حسام حبيب على الرد، وقال الفنان: أقرب الناس لينا متورط في محاولة تشويه العلاقة مع شيرين والناس دى كان لها مصالح إن شيرين تبقى منتهكة لمصالحهم الشخصية، مضيفا: أن الفنانة لها شركة تدير عملها ولا علاقة له بعملها.
وقال حسام حبيب: أنا تزوجت شيرين عبد الوهاب وهى أنجح واحدة في الوطن العربى ولا تحتاج لأحد، وبالنسبة لأقرب الناس لينا هما هيفضلوا يعملوا الحاجات المستمرين فيها دى لأن الحنفية اتقفلت وهؤلاء غير أسوياء ومش من حق أي حد إنه يتدخل في العلاقة بينى وبين زوجتى حتى أقرب الناس لى.
وتابع: “هذا الشخص القريب جدا مش أول مرة يأذينى وأسف إن بقول عليه هذا الشخص رغم قربه منى (يقصد والده)، كفاية وحسبى الله ونعم الوكيل وهذا ليس معناه ضعف وإذا استمر هذا أنا قادر أجيب حقى بالقانون حتى لو كان قريب منى”.
وأضاف: “التسجيل صحيح ويحاول الافتراء وخراب البيوت وللأسف جاب سيرة والدتى رغم إنه الشخص اللى مخلفنى ومنفصلين وكانت دائما تدعونى للسؤال عنه وللأسف استدرج لمصالح شخصية هو طرف فيها”.
