شريف منير يدعم ابنته بعد حلاقة شعرها زيرو: شكلك حلو وزي القمر.. اوعوا تفتكروا إني هاجي على بنتي عشان خاطر أكسب رضاكم 

منير: بنتي متربية كويس جدًا بس هي بتتصرف باللي هي حاسة بيه.. المهم إنها متكونش بتأذي حد 

بنتي عندها 36 سنة وأم وعندها بنوتة ومسؤولة عن نفسها.. وأنا أب مسؤول إني أحميها وهي حرة في تصرفاتها  

كتبت: ليلى فريد  

أعلن الفنان شريف منير، تضامنته مع ابنته اسما بعد الهجوم الذي تعرضت له بعد حلاقة شعرها زيرو، في مقطع فيديو. 

وقال شريف خلال فيديو نشره عبر حسابه على (إنستجرام): مساء الخير، باكل سمك مشوي ورز أبيض، إيه الدوشة اللي إنتو عاملينها دي وإيه الضجة اللي إنتو عاملينها دي، كل ده عشان بنتي قصت شعرها قدام الكاميرا إيه الغلط اللي هي عملته، تصرف عادي جدًا مفيهوش أي حاجة، إوعوا تفتكروا إني هاجي على بنتي عشان خاطر أكسب رضاكم.. دي بنتي اللي ماليش غيرها وبحبها. 

وتابع: بالمناسبة اللوك اللي عملته عاجبني وأنا مبسوط منها أوي، بس قبل ما الإخوة السادة الملايكة الصالحين اللي عمالين يقلوا أدبهم ويشتموا، وبيقولوا تاخد التريند وجاتها البلاء في شكلها وبيقولوا أبوها معرفش يربيها، لا أنا بنتي متربية كويس جدًا بس هي بتتصرف باللي هي حاسة بيه، المهم إنها متكونش بتأذي حد. 

وأضاف: قبل ما تتكلموا بصوا على نفسكو واتفرجوا على عيلتكو وعلى إخواتكو وعلى الناس اللي حواليكو قبل ما تنتقدوا وتغلطوا وتقولوا متربتش بـ 3 تعريفة أو بربع جنيه تربية، لا أنا بنتي متربية كويس جدًا. 

وقال منير: على العموم ريحو نفسكو واهدوا شوية؛ لإن اللي حصل من بنتي مش غلط ومش عيب هي مغلطتش في حد فيكو ومغلطتش في نفسها وبعدين بنتي عندها 36 سنة وأم وعندها بنوتة ومسؤولة عن نفسها، وأنا أب مسؤول إني أحميها وهي حرة في تصرفاتها. 

واختتم: أسما أنتي شكلك زي القمر وشكلك حلو جدًا وخدتي التريند برافو عليكي، متسمعيش كلام حد ومتهتميش بكلام حد وأنا مش مهتم بالكلام اللي بيتقال عليا ولا عليها المهم إننا مش بنضر حد، سلام عليكم. 

وكانت اسما شريف منير نشرت مقطع فيديو أثناء حلاقة شعرها زيرو، مما عرضها موجة لانتقادات على مواقع التواصل.