رسالة من والدة شادي أبو زيد بعد تدويره في قضية جديدة: أروح لمين عشان عمر ابني اللي بيضيع؟
والدة شادي: حمدت ربنا بعد قرار إخلاء سبيله وغسلت هدومه ورتبت غرفته.. لكنه ماخرجش
أرسلت والدة المدون شادي أبو زيد، رسالة عبر حسابها بموقع فيسبوك، للمطالبة بالحرية لنجلها بعد حبسه حوالي ٢١ شهرا ثم إعادة تدويره في قضية جديدة.
وأخلت محكمة الجنايات سبيل شادي على ذمة القضية رقم ٦٢١ لسنة ٢٠١٨، بعد ما يقارب ٢٠ شهرا من الحبس الاحتياطي، ولكن قبل إخلاء سبيله تم اتهامه في قضية جديدة.
وقالت والدة شادي في رسالتها، إنها لا تريد سوى الحرية لابنها الذي يتم هدر عمره في الحبس الاحتياطي، متسائلة (أروح فين ولا أعمل أية؟).
نص الرسالة:
مش عارفة ممكن اعمل ايه او اكلم مين تاني عشان أسأله على ابني وليه بيحصل فيه كل ده، مش بعرف اتعامل على الفيسبوك بس عاوزة استنجد بكل حد، عاوزة اعرف ليه ابني يتحبس ٢١ شهر وبعدين يأخد اخلاء سبيل ويرجع يتحبس في قضية تانية، ليه عمره يتاخد منه كل ده،
مبقتش عارفة ممكن اعمل ايه تاني طلبات والتماسات ومكالمات ومحايلات وبرضه مفيش فايدة ابني بيضيع مني .. فضلت صابرة ومحتسبة وبعد الايام واقول هانت وابني هيرجع لحضني ولبيته ولحياته، بحمد ربنا في الوحش قبل الحلو واقول ابتلاء وربنا هيقدرنا ونعديه لحد ما حبيبي ونور عيني خد اخلاء سبيل والنيابة مستئنفتش والفرحة مبقتش سايعاني ودبحت وغسلت هدومه ورتبتله حاجته عشان يخرج يلاقي حاجته جاهزة .. اليوم اللي كان المفروض اروح اخده فيه من القسم علي البيت عرفت انه اتنقل علي نيابة امن الدولة عشان قضية جديدة وهو في السجن .. طب ازاااااااي؟ ازااااي وابني عندكم وتحت عنيكم ؟؟؟ ازاي واحنا زيارتنا فيها مخبر بيكتب كل كلمة بنقولها؟؟؟ المأمور كان فين ودا بيحصل؟؟
ابني اتكسر بموت ابوه وهو بعيد عنه وأول واخر مرة شافه فيها من يوم ما اتحبس كان متكفن .. ابني عايش يومه مبيفكرش غير فيا انا واخته وكل زيارة يقولنا متجوش تاني عشان مش هاين عليه بهدلتنا في الزيارات وبيعد الايام عشان يخرج مش عشان نفسه، عشان يشيل حمل البيت عن اخته وعني ويبقي جنبنا وراجلنا .. ابني مكانش في حاجة في دماغه غير انه يرجع يعيش في سلام مع امه واخته مكانش عايز حاجة تانية من الدنيا وكان ماشي جوا الحيط طول فترة حبسه وكل اللي في السجن من اصغر واحد لأكبر واحد يشهدوا بدا بس الحاجات دي طبعاً مش موجودة في تحرياتكم .. انا بكتب علي الفيسبوك من عجزي وقهرة قلبي علي ابني عايزة رد من حد ، من اي حد ابني بيحصل فيه كدة ليه؟ بيتعاقب؟ مهو اتعاقب بما فيه الكفاية لمدة سنتين بتعملوا فيه كدة تاني ليه؟ عايزين ايه عشان تخرجوه وتسيبوه في حاله ؟؟ انا مستعدة اعمل اي حاجة عشان ابني يرجع لحضني
يا سيادة الريس يا أي مسئول حط نفسك مكاني لو ابنك محروم من حريته عشان حاجة معملهاش، لو ابنك بينام علي الأرض من غير غطا في عز البرد ، لو ابنك معندوش حتي المية اللي يستحمي بيها ، لو ابنك كل شوية يعيي سواء امراض جلدية عضوية او نفسية .. هتستحمل وترضي؟
وافوض أمري إلى الله ان الله بصير بالعباد
