رسالة مؤثرة لابنة أبو الفتوح في عيد ميلاده الخامس بالسجن: ليه والدي اللي عمره ٧١ سنة يكون محبوس في ظروف غير آدمية ميستحملهاش شاب

أرسلت الدكتورة عُلا أبو الفتوح نجلة الدكتور عبد المنعم أبو الفتوح رئيس حزب “مصر القوية” برسالة عبر “فيسبوك” إلى والدها المحبوس منذ أكثر من 4 سنوات، بالتزامن مع عيد ميلاده الـ71.

وأشارت عُلا – في رسالتها – إلى أنها كانت تتمنى أن تحتفل بعيد ميلاد والدها وتزوره وتتحدث معه، لكنها لم تتمكن من ذلك.

وقالت: “أنا نفسى بحاول استوعب … ليه والدى في السجن لحد النهاردة … ليه والدي اللي عمره ٧١ سنه يكون محبوس في ظروف غير آدمية ميستحملهاش شاب عنده ٢٠ سنة!”.

وفيما يلي نص الرسالة:

كل سنه وأنت طيب يا بابا يا حبيبى

كان نفسى أحتفل معاك بعيد ميلادك وأزورك زيارة طبيعية و أتكلم معاك و تحكيلي على كل اللي عانيته السنين اللي فاتت من ظلم و قهر في سنك ده

كان نفسي ابنى يقعد معاك و يكلم جده حبيبه!!

كان بقالى سنة ونص مشفتش بابا و نزلت اجازة قصيرة انا وابني الصغير وللأسف معرفتش أقعد مع بابا.

حاولت الزيارة أكثر من مرة و منعت بسبب إنه كان لسه ناقل سجن بدر

يوم سفري حاولت أزوره تاني بس كان أول يوم زيارة فى سجن بدر لكل السياسيين و الوضع كان مأساوي

للأسف والدي يومها امتنع عن الزيارة بسبب رفضهم إنى أقعد معاه و خصوصا إن كان معايا ابنى اللي بقاله ٥ سنين بعيد عنه. مش فاهم ليه جده هنا و مش مستوعب ليه مش قادر يقعد معاه وشايفه من ورا حاجز زجاجي.

كذبت عليه و قلتله جدو بس تعبان و هما خايفين عليه عشان سنه كبير و اول لما جدو يخف هيجى يقعد معانا

مكانش عمره هيفهم ولا هيستوعب لو قلتله الحقيقة !!!!

قعدنا ست ساعات انتظار عشان نشوفه لحظات و يقولنا فيهم إنه عايش في وضع قاتل وياخدوه مننا و يرفضوا نزوره إلا لو من خلال حاجز زجاجي.

أنا نفسى بحاول استوعب … ليه والدى في السجن لحد النهاردة … ليه والدي اللي عمره ٧١ سنه يكون محبوس في ظروف غير آدمية ميستحملهاش شاب عنده ٢٠ سنة!

ليه كل السنين دي في حبس احتياطي ؟

ليه محبوس انفرادي ؟…

ليه العزلة عن البشر ؟…

ليه يتمنع من الخروج من الزنزانة والتريض وقت معقول ؟…

ليه متنقلش للمستشفي لحد دلوقتى في الوقت اللي حياته في خطر حقيقي طول الوقت ؟ … ليه مفيش رعاية طبية ولو بالحد الأدنى اللي يحميه من خطر الموت ؟… ليه استمرار التجاهل المتعمد والتعنت وتركه في وضع يقتله ؟ …

ليه دلوقتى ممنوع من المكتبة و المسجد والكتب والصحف ؟ …

ليه بتعاملوهم معامله تخالف القانون وضد أبسط قواعد الانسانية ؟ …

أوامر عليا نقلتهم السجن … هل الاوامر العليا قالت ينام على مرتبة على الأرض من غير سرير؟ هل قالت يفضل بنفس لبسه طول الفترة دى؟ من غير كانتين السجن و لا هدوم و لا مغسله ؟

هل قالت يتحرم من المتابعة الطبية الدورية رغم خطورة وضعه الصحي؟ ليه متنقلش للمستشفى للرعاية الطبية ولو لحين تجهيز السجن؟

بنحاول نستوعب الوضع المؤذي اللي عايش فيه حاليا. في الوقت اللي من المفترض ان فيه استراتيجية جديدة لحقوق الانسان و مبادرة الحوار الوطني والدى بيواجه وضع أسوأ وأشد خطورة على حياته …

ربنا ينجيك بإذن واحد أحد من كل شر وأذى و تخرج تنور حياتنا و حياه أحفادك. ربنا يطولنا في عمرك و يديك الأمل والقوة و يصبرك!!

وربنا يسهل على كل إنسان بيسهل عليك وعلى كل مظلوم و يسخر لك الناس الطيبه ويبعد عنك أى سوء.