د. منى مينا تكتب عن تخصصات الأطباء: مشكلة مزمنة عجيبة  

من المشاكل المزمنة لشباب الأطباء وللمستشفيات كمان .. مشاكل حركات النيابة “الفقيرة” التي لا يجد فيها الكثير من الأطباء الفرصة الفرصة لدراسة التخصص الذي يحلمون به .. والمستشفيات مش لاقيه شباب يشيلوا الشغل .. 

طيب ليه ؟؟؟ هل ده مثلا المستشفيات متخمة بالنواب في التخصصات دي؟؟، لا ..بالعكس .. المستشفيات بتكون محتاجة .. ومش لاقيه نواب، ونعرف بالفعل مستشفيات كتير مستنية أي نائب يجي، طيب ليه؟، والله مش قادرة أفهم.  

نفس المشكلة موجودة حاليا في حركة النيابات لتكليف النائي 2023 والحركة الأساسية لـ 2022، خليني أنقل بعض الرسايل المعبرة عن المشكلة اللي وصلت لي عن حركة النيابات دي، إحدى الطبيبات تشرح الآتي:- 

بالنسبة لتخصص النسا اللي أنا باتابعه بدقة ..  

في محافظات مش نازل فيها ولا مكان نسا .. ومحافظات نازل في المحافظة كلها مكانين، ومحافظة كبيرة زي الجيزة نازل فيها 5 نيابات نسا في مستشفيتين 2 بس، كل النيابات نازله في مستشفيت المؤسسة العلاجية وأمانة المستشفيات المتخصصة، ودي شغلها بفلوس للمرضى، عشان كده معدل الشغل فيها ضعيف جدا بدرجة لا تسمح باكتساب الخبرة. 

معقولة كل المستشفيات العامة والمركزية لا تحتاج لنواب نسا شباب ؟؟ طيب مين اللي ها ياخد نطبشيات السهر والمبيت؟”  

طبيب آخر أرسل لي:  

“الوزارة عاوزة تزود أطباء طب الأسرة وبعض التخصصات الملحة، طيب وماله يعملوا مميزات للتخصصات دي حافز ندرة مثلا، تحسين للتدريب وسهولة في الالتحاق بالدراسات العليا، وأكيد الشباب ها يروحوا له بنفسهم ..مش جبرا بعدم توافر التخصصات الأخرى اللي المستشفيات محتاجة لها برضه، والله عين العقل يا إبني ..يا ريت السادة مسئولي الوزارة يسمعوا. 

الشباب رصدوا برضه إن في بعض النيابات بتوزع على مستشفيات ليس بها قسم للتخصص اللي الطبيب الشاب مفروض يروح يتدرب عليه .. طيب ها يروح يعمل إيه؟  

وإن الاحتياجات اللي نزلت في الحركتين السابقتين لم تستكمل .. يبقى ليه لا يتم استكمالها في الحركة دي ..ناخد بالنا إن اسمها “احتياجات” يعني المستشفيات محتاجة .. 

طيب ليه يا وزارة؟، خلينا نطلب من وزارة الصحة تسمع لصوت الشباب ..اللي بيتكلموا بمنتهي العقل والموضوعية وتدي لهم فرص حقيقية للشغل واكتساب المهارات وخدمة المرضى .. الشباب مش طالبين كتير والله.