د.محمد علام يكتب عن تجربته مع كورونا بعد إصابته بالفيروس: هذه هي الأعراض والتدخين لا يحمي.. التزموا بالتعليمات

عبد الرحمن بدر

وجه الدكتور محمد علام، نائب مدير مستشفى النجيلة للعزل الصحي عدة نصائح لمواجهة فيروس كورونا، وقال علام إن التدخين لا يحمي، وأنه كان سببًا في زيادة أعراض الإصابة لديه.

وأضاف: ” بكم أنتم الوباء هينتهي، بس ساعدوا بعض والتزموا بتعليمات وزاره الصحة ووعوا اللى مش فاهم”.

وإلى نص ما كتبه محمد علام:

أنا بخير لكل زمايلي وأهلى والناس اللى بعتولى وحاولوا يتصلوا بيا يطمنوا عليا اليومين اللى فاتوا بعتذر مكنتش قادر ارد عليكم

ناس سالتنى عن الأعراض مبدئيا الأعراض زى ماتكلمت من شهرين، بتختلف من شخص لشخص مينفعش أقول أنا عندى كذا وكذا لأن استجابه جسمى مش زى جسمك لكن هنعتمد على الدراسات اللى اتعملت على الالاف الحالات وشفناها فى الحالات اللى كانت عندنا وللاسف فى نفسنا.

اولا الاعراض:

أشهرها ارتفاع بدرجه الحرارة ودى فى حوالى ٨٠ لـ ٩٠ ٪ من الحالات تستمر لايام وممكن تختفى وترجع تانى

تانى أشهر الاعراض سعال جاف فى حوالى ٦٠٪ من الحالات

وآخر حاجة ألم بالجسم وده فى حوالى ٤٠ لـ ٥٠ ٪ من الحالات

يعنى ممكن الموضوع يبدء بكل الأعراض أو عرض واحد أو حتى دون أعراض نهائى.

بعد كده المرحلة الثانية ضيق بالتنفس وارتفاع فى معدل التنفس وده خلال أسبوع من بداية الأعراض أو أقل حسب مناعة الشخص وده بداية الالتهاب الرئوي ومش بيحصل لكل الحالات ولو محصلش فانت خلاص بتخف

لكن لما بيحصل بيبدء يزيد بسرعه خلال يومين فقط بيكون التهاب رئوى شديد وبيحتاج لجلسات واكسجين وتدخلات أخرى.

وبعد كده بيومين فشل بوظائف التنفس وبتصل للوفاه لو متحسنش.

ده تسلسل المرض طبقا لآخر تحديث للصين على عدد الحالات اللى عندها وكمان CDC وغيرهم فى اجماع على الاعراض دى باختلاف النسب بفروق طفيفه اى اعراض اخرى فهى نادره جدا وتكاد لا تحدث زى الاحتقان بالحلق والرشح واضطرابات المعدة.

ثانيا امتا أروح اكشف ؟؟ لو بدأت ارتفاع درجه الحراره وسعال اروح اكشف هيتعمل تحاليل واشعه وبعض الاسئله عن اماكن تواجدك اخر فتره واختلاطك بمرضي ايجابيين او مشتبه فيهم او دخولك مستشفيات لو حصل ان اى حاجه من دول تخلى الطبيب يشك هيتعملك مسحه لو لا فانت مفيش عندك حاجة.

وارد جدا انك فى اى مرحلة من دول تخف بدون أعراض أو بأعراض بسيطه أو باعراض شديده أو حتى فى مرحله حرجة.

علشان كده المخالطين لحاله ايجابيه بيتقالهم يقعدوا فى البيت لمده ١٤ يوم لو مظهرش اعراض فانت كده اما كان عندك المرض بدون اعراض نهائى وخفيت أو معندكش أصلا.

إنما لو ظهر أعراض حتى لو بسيطة درجة حرارة أو سعال فانت لازم يتعملك مسحه لأن كده أنت مشتبه فيه مش مخالط.

إنما أنا مريت بإيه. فللاسف لانى مدخن على بسيط والحمد لله بطلت لما تعبت فالاعراض كانت شديده شويه وكان فى التهاب رئوى بس بدأ يخف وحاليا ارتفاع بدرجه الحراره متوقع وبخف كلها ايام وابقى سلبى (التدخين مش بيحمى).

مردتش اتصور قبل ماعرف اضحك لانكم عرفتونى متفائل مينفعش تشوفونى متشائم.

بكم أنتم الوباء هينتهى والله بس ساعدوا بعض والتزموا بتعليمات وزاره الصحة ووعوا اللى مش فاهم.