د. ليلى سويف تنهي إضرابها عن الطعام.. ومنى سيف: لم نتجاوز مرحلة الخطر 

أعلنت الباحثة منى سيف، إن والدتها الدكتورة ليلى سويف، قررت إنهاء إضرابها عن الطعام الذي بدأته منذ شهور للمطالبة بالإفراج عن نجلها المدون علاء عبدالفتاح. 

وقالت منى في تدوينة لها: “إمبارح ماما بلغتني إنها قررت تنهي الإضراب، وهتبدأ الإجراءات الطبية اللازمة مع الدكاترة”.  

وتابعت: “فطلع إن مناشاداتنا -وانهياراتنا برضو – لسة بتجيب نتيجة، فأولا شكرا لكل حد ضم صوته على مناشدتنا لماما وساعدنا نخليها تشوف حجم الهلع اللي كنا فيه، ممتنة لكم لآخر العمر”. 

وأضافت: ثانيا إحنا لسه ما عديناش مرحلة الخطر، ماما النهاردة في المستشفى بتبدأ فعلا خطة إعادة التغذية. واحدة من الحاجات المقلقة جدا لما جسم بيتعرض لتجويع فترات طويلة كدة، حاجة اسمها refeeding syndrome، وده بيحصل لما الجسم يرجع يدخله جلوكوز بعد فترات حرمان طويل، فبيحصل حركة ايض ودفق في الأملاح والمياه في الجسم ممكن تعمل خلل يؤثر على وظائف حيوية زي القلب والمخ”. 

وواصلت: عشان كدة من أول الإضراب ده كل مرة نروح المستشفى كل دكتور معدي يؤكد علينا إن لو ماما هتفك الإضراب في أي لحظة لازم تعملوا عندهم تحت إشراف طبي كامل. 

وقالت منى: ماما هتبدأ اعادة التغذية النهاردة وهي في المستشفى، وهم بيتابعوا لحظة بلحظة كل مؤشراتها الحيوية وبيعملوا تحاليل دم، لحد ما يطمنوا إن جسمها وصل حتة مستقرة كافية انها تخرج من المستشفى وتكمل زيادة تدريج التغذية في بيتها وسط اهلها، وقتها هيبقى قدامها رحلة تعافي طويلة برضو بس على الاقل هتبقى في وسطنا مغمورة بحبنا.  

وتابعت: بعد ١٠ شهور إضراب، وبعد ما جسمها تآكل تماما وكنا خايفين يبقى وعيها وعقلها كمان بينهار، أكيد اللي بيحصل دلوقتي حالا افضل من اي احتمالات تانية كنا بنواجهها: ماما سمعتنا”. 

واختتمت: “ماما في المستشفى في ايدين فريق طبي هايل ومهتم، ماما متحاوطة بحب ودعم ناس من كل بقاع الدنيا، ناقصنا بس أهم حاجة، واللي هي المحرك الأساسي لقرار ماما سبتمبر اللي فات: خروج علاء ولم شمله بخالد ابنه، علاء لسة في السجن، علاء خلص كل المدد اللي اتحكم له بيها ظلم وبرضو لسة محبوس، علاء لازم يخرج لحضن ابنه ويبقى جنب ماما وياخد بايدها وهي بتتعافى”.