دينا توفيق تكتب: حب فناناتنا الجميلات فى زمن الكورونا والوحشية!

هروبا من الكلام اللي لا هيودي ولا هيجيب عن عائلة علاء عبدالفتاح والست العظيمة د. ليلى سويف والبنات المناضلات منى سيف وسناء سيف  .. وحكايات الجوابات اللي مبتطلعش من المساجين لذويهم والقرف الملبس بالطين والقطران ده كله واتهامات رئيس الوزراء للأطباء اللي يبدو ملهمشى صاحب!!

وهروبا من سيرة افتتاح المهرجان الأقوى لانتشار الكورونا والتخلص من نص شعب مصر بفك الحظر والانطلاق الجزئي ٢٥% واللي هيزيد تدريجيا بوعد من الحكومة لو الشعب شغل وعيه ههههه ربنا يستر 🙈

دعونى أهرب من الكلام العويص ده كله واكتب فى حب فناناتنا الخالدات.. واعتقد أن ده موضوع مهم برضه ومش هايف..

بس أكيد فى كلام أهم منه بس كتابته لا هتصد ولا هترد يعني..

فسيبيكوا من عذاباتنا وخلينا نتكلم عن الجميلات وأراء شخصية جدا بس اعتقد لها طعم.. الله أعلم يعنى هههه

مساكم فل..

أولا بقى أنا بأحب سعاد حسني بالفطرة لحد هذه اللحظة ولما باشوفها بتتكلم فى أى مقابلة عنيا بتترغرغ بالدموع وكأنها حتة منى.. ويمكن ده عشان حسيت بأمومتها فى فترة قصيرة من طفولتى، ولذلك قصة سأقوم بسردها يوما، وفضلت معلمة جوايا أوووووى ومتوحدة مع حاجات كتيرة فيها اهمها انها كانت ست صادقة وحقيقية وعاشت أحزان كبيرة بسبب تركيبتها النفسية وكل اللي اتعرضت له وهي شابة يافعة وجميلة جدا وبتدور على الحب وبتقع في أخطاء فادحة بسبب اختياراتها الخاطئة دي   ..

وحبيت صباح حب مالوش أول من آخر لأنها صافية ومتسقة مع نفسها جداااااااااااااا ورغم ان اختياراتها هى كمان كانت خاطئة إلا أنها كانت بكل حبها للحياة والجمال قادرة أنها تخلق لنفسها زهوة لا تنافسها في مساحتها أي ممثلة أو مطربة تانية..

وفتنتى شادية بطريقة عجيبة لدرجة أني لما شوفتها من ٢٢ سنة فى اسانسير شريتون حضنتها جامد وحسيتها حضنتنى حضن جميل بجد واستشعرت انها حبت احساسى بيها  ..

وحبيت كمان نادية لطفى أوي وأبهرتنى بثقافتها السياسية ومواقفها هي والست تحية كاريوكا العظيمة.. الستات دول ستات حقانيين وفاهمين أوي وفى زمرتهم الست سناء جميل وزوزو نبيل..

الفاتنة مرفت أمين لها مكانتها فى قلبي وخاصة زاد الحب ليتحول لايمان انها ممثلة بجد بعد زوجة رجل مهم..

اما القنبلة شويكار فهى فى حتة تانية خالص قاعدة ومتربعة كدة ومحدش يزحزعها وجنبها الست هدى سلطان بكل صراحة..

….

وكمان حبيت الستات صاحبات الشخصيات الرهيبة زى زوزو ماضى وزوزو حمدى الحكيم ونجمة ابراهيم  ..

وكان جمال الست زهرة العلا النادر ونعومتها سبب محدوديتها بس ده مخلانيش محبهاش بل حبتها جدا هى والست ليلى طاهر والست ليلى فوزى جميلة الجميلات …

اما مديحة يسرى فكانت وستظل نموذجية فى حدود ادوارها الخفيفة اللطيفة وجمالها النادر وبصراحة كفاية انها عاشت مع العظيم محمد فوزى لاخر لحظات حياته التى فقدها فى خضم الظلم والافتراء على خلق الله لمجرد انهم ماكانوش بيقدموا فروض الولاء والطاعة للفراعنة اللى فضلوا يحكموا مصر كالهة ..

وبجد باموت فى نيللى وخفتها من زمان هى ولبلبة وفيروز وميمى جمال الجوزاء المثالية صاحبة الامومة ومعاهم فى نفس المكانة الست رجاء الجداوى ربنا يشفيها ويعافيها  ..

كنت باحب نبيلة السيد وسهير البارونى ووداد حمدى وبيضحكونى وكأنهم قادرين على زغزغت روحى من جوة  !

الستات بقى بجد اللى محدش ممكن يختلف عليهم ابدا هم عظمة مارى منيب هانم والست زينات صدقى باشا والحلوة الدلوعة ميمى شكيب ..  والام الطيبة الست فردوس محمد ..

وكمان الست علوية جميل حبيتها بكل جبروتها

وحبيت كمان اوى الست عقيلة راتب معرفش ليه لله فى لله كده.. أما الستات هدى وصفى وإحسان القلعاوى دول بقى فقمم ودواهى فنية معتقة

…

كنت باستلطف ممثلات زى نيللى مظلوم يمكن عشان بيتقال انى شبهها هههه بس لاء بصراحة كانت حلوة وشيك وزى الفاكهة..  وكنت معجبة كمان بسامية جمال جدا وكتير اوى من الممثلات والراقصات لهم مكانة فى وجدانى لانهم فنانات بجد ومنهم الست كيتى الراقصة اليونانية اللى مثلت مع اسماعيل يس والست سهير زكى ونعمت مختار  ..

…

بس لازم اعترف اعتراف معرفش هتغفروهولى ولا لاء وهو ان فضل هناك حاجز نفسى عظيييييم عمرى كله بينى وبين الست فاتن حمامة ومكسرهوش كونها كانت جوزاء زيى مثلا او انها كانت ممثلة شاطرة او انها الوحيدة اللى حبها عمر الشريف اللى بموت فيه ههههه ورغم حبى له ما ينفيش ده انه كان راجل خاين ههههه…

وكمان الست ماجدة الصباحى اللى مثلت بفلوسها “فهمى نظمى رسمى” من وجهة نظرى فعمرى عمرى ما اتفاعلت معاها ولا كان فيه بينى وبين تمثيلها عمار خاااالص..  بل كان فيه جدار فولاذى بينى وبينها خصوصا فى ادوار المراهقة وفلفل شطة والهجص ده… الحاجة الوحيدة اللى ظبطت العك ده فقط اختيارها لشخصية جميلة بو حريد.

وكمان بقى كنت باتعاطف مع هرتلة الست مريم فخر الدين هههه اللى كانت ست اروبة جدا بس طيبة لانى شوفت طيابتها من قريب  ..

وحبيت بكل فخر اعتزاز لبنى عبد العزيز بنفسها وبثقافتها بشكل لاقيت معاه انها من الممثلات الواعيات والمدركات لقيمتهم كويس جدا.

وفضلت فيه مجموعة ممثلات هن وللحق نجمات ادوا ادوار عظيمة بس عمرى ما دورت عليهم مخصوص عشان اشوفهم وهذا ربما لقصور عندى زى الست سميحة ايوب والست سهير المرشدى والست سميرة محسن ..

وكمان فى ممثلة ما كانتش شاطرة اوى بس شيك اوى وجميلة سافرت المانيا زمان واتجوزت هناك ومثلتلها كام فيلم غنالها فيهم عبد الحليم وسعد عبد الوهاب  …  اه اسمها ايمان كانت ست جميلة جدا وفضلت محافظة على نفسها بدرجة انى شوفتلها برنامج ظاهرة فيه وهى فالعمر ده وجميلة برضه  ..

…..

اما من ارجأت الكلام عنها لاخر سطر فهى الست امال فريد وناس كتير اعتقد ما يفتكرولهاش غير دورها فى بنات اليوم وبداية ونهاية ويمكن فيلم مع اسماعيل يس والتى لم اكن من معجباتها وكنت باستغلس تمثيلها بس الحق يقال قابلتها فى احدى مقاهى الزمالك وحبيتها وحبتنى وبقينا اصحاب ولما أغيب تسأل عنى واكتشفت ليه ماكنتش نجمة او ما وصلتش لمكانة النجمات اللى فاتوا دول كلهم بس لده كلام لاحق لان المهزلة الكورونية والسياسية مطولين وهنرغى فالمواضيع اللى من النوع ده شكلنا كدة كتير.