خلال مناقشة للموافقة على قرض بـ 2 مليار يورو للقطار الكهربائي.. النائب فريد البياضي للحكومة: خنقتونا احنا واللي خلفونا واللي خلفناهم (فيديو)
البياضي: المواطن مش هاياكل قطر كهربا و مش هايتعالج بقطر كهربا.. كفاية كدا على الحكومة لا تحكم و لا تستطيع أن تحكم وغير مؤهلة للحكم
كتب – أحمد سلامة
انتقد النائب فريد البياضي، ارتفاع معدلات القروض لاستكمال مشروعات الطرق، وذلك على هامش جلسة مجلس النواب التي طالب خلالها كامل الوزير، وزير النقل، بالموافقة على قرض بقيمة 2 مليار يورو لاستكمال القطار الكهربائي.
وقال البياضي “يا سيادة الرئيس النهاردة جايين نتكلم على قرض للقطار الكهربائي بـ 2 مليار يورو، أي ما يقرب من حوالي 66 مليار جنيه مصري، هو إحنا خلال الأولويات راحت؟”.
وأضاف “نيجي النهاردة نتكلم على قطار كهربائي تاني؟! وقروض تاني؟ الحكومة خنقتنا.. خنقتنا إحنا واللي خلفونا واللي خلفناهم واللي هيخلفوهم بعد كدا، الأجيال اللي جاية هتتحمل القروض دي وهتدفعها من دم قلبها، النهاردة بنتكلم على قطار كهرباء تاني؟ هي فين الأولويات؟ هو المواطن هياكل قطر كهربا؟ المواطن هيعيش من القطر الكهربا؟”.
وتابع “الدستور بيجي عند وزارة النقل ويكون مفتوح، لكن نيجي عن التعليم والصحة وننتهك الدستور ومياخدوش الحد الأدنى الموضوع لهم، الناس بتقول كفاية كدا.. أنا من 3 سنين وقفت هنا لوحدي وطالبت برحيل الحكومة، النهاردة أنا مش لوحدي ومعايا نواب كتير بنطالب برحيلها، هذه الحكومة لا تستطيع أن تحكم وغير مؤهلة للحكم وكفاية عليها لحد كدا”.
