حسام بهجت يروي معاناة شاب سكندري تم تدويره على ذمة 6 قضايا: اختفى 6 أشهر وأسرته عرفت بالصدفة أنه في نيابة “فوة” بكفر الشيخ

خالد عبدالمجيد إسماعيل.. حكاية كعب داير لشاب ثلاثيني بين نيابات كفر الشيخ ومينا البصل والمنتزه والدخيلة والعامرية.. و 5 قرارات بالإخلاء

كتب – أحمد سلامة

روى الناشط الحقوقي، حسام بهجت، تفاصيل معاناة مواطن يدعى خالد عبدالمجيد إسماعيل، والمحبوس حاليًا في قسم العامرية، مشيرًا إلى أنه حضر معه اليوم جلسة تجديد حبسه بعد أن تم تدويره 6 مرات بنفس الاتهامات في 6 قضايا مختلفة.

ونشر بهجت، عبر صفحته على موقع التدوينات القصيرة “تويتر”، صورة لـ خالد عبدالمجيد، وعلق عليها “عايز اعرفكم على خالد اللي في الصورة، خالد بلدياتي من السيوف في اسكندرية عمره ٣٤ سنة وليسانس آداب انجليزي دفعة ٢٠٠٩. من ٣ سنين وشوية نزل من البيت ومرجعش. أهله استنوا ٣ أيام وبعدين عملوا محضر اختفاء في القسم. بعد ٦ شهور بدون أي خبر أهله جالهم تليفون من محامية إنها شافته صدفة.. فين؟ في نيابة مدينة فوة في كفر الشيخ”.

وأوضح بهجت “طلع اتمسك من الشارع ومحبوس بالتهمة المعتادة الانضمام لجماعة اسست على خلاف القانون قضية ١٤٨٨ لسنه ٢٠١٩. النيابة أمرت بإخلاء سبيله بضمان محل إقامته الحمد لله. قبل ما يطلع اترحل اسكندرية ونزل بنفس التهمة في قضية تانية رقم ٥٢٣١ لسنه ٢٠٢٠ مينا البصل”.

وتابع الناشط الحقوقي “راح النيابة أمرت بإخلاء سبيله بكفالة 500 جنيه الحمد لله. دفعنا وقبل ما يطلع اترحل على قسم المنتزه في اسكندرية ونزل بنفس التهمة في قضية ثالثة رقم ١٤٥٢ لسنه ٢٠٢١ منتزه ثان. راح النيابة أمرت بإخلاء سبيله بكفالة 5 آلاف جنيه الحمد لله”.

وأردف “دفعنا وقبل ما يخرج اترحل قسم الدخيلة ونزل بنفس التهمة في القضية الرابعة رقم ٦٦٠٧ لسنه ٢٠٢١ الدخيلة. راح النيابة وأمرت بإخلاء سبيله بتدابير احترازية انه يروح القسم كل يوم حد واربع من ٨ ل٩ بالليل. الحمد لله. قبل ما يخرج نزل بنفس التهمة في قضية خامسة رقم ٢٩٨٩ لسنه ٢٠٢٢ الدخيلة”.

واستكمل بهجت “رجع النيابة فأمرت بإخلاء سبيله بكفالة كمان 5 آلاف جنيه الحمد لله. لكن بعد ما دفعنا الكفالة رحلوه على قسم العامرية في اسكندرية وتم تدويره على القضية السادسة برقم ٥٦٥١ لسنه ٢٠٢٢ عامرية ثان بنفس التهمة”.

واسترسل “بقى لنا كده من امتى؟ من نوفمبر ٢٠١٩ لدلوقتي. بعد التلات سنين دول خالد دائما مصاب بامراض جلدية بسبب سوء نضافة الاقسام اللي بيتنقل فيها. كان مريض غضروف اصلا واصبح مش قادر ينام من الالم بسبب نومه على الارض ٣ سنين وشوية. ضروسه بتتفتت وتقع لوحدها ومش قادر يشوف طبيب أسنان”.