تامر حسني يرد على هجوم حلا شيحة: مضيتي العقد وتقاضيتي مبلغ كبير.. هل صورتي ومثلتي بمنتهى الرضا ولا حد أجبرك؟
تامر: عمري ما وعدتك إن الكليب مش هينزل.. واحترمت كلامي معاكي ووعدتك أشيل مشاهد تانية طلبتيها وشكرتيني عليها
الفنان: الفيلم بقاله ٣ أسابيع في السينما والكليب موجود.. بالنسبالك الحرام إننا ننزل الكليب على اليوتيوب بس إنما يتشاف بالسينمات عادي؟
كتب: عبد الرحمن بدر
رد الفنان تامرحسني، على هجوم الفنانة حلا شيحة على فيلم مش أنا الذي شاركته في بطولته وعرض مؤخرا في السينمات.
وقال تامر: «نهاركم جميل يا أغلى الناس الحقيقه عمري ما بتخيل إني أدخل في نقاش بالشكل دا مع زميل بحترمه و كان في بينا كل خير، للتوضيح بما إنك يا حلا كتبتي بوست وأشركتي الجمهور الكريم معانا بدال ما كنتي تكلميني شخصياً ونتناقش بيني وبينك، فا أنا مضطر أرد هنا برضو».
وتابع: «أولاً أنا عمري ما وعدتك إن الكليب مش هينزل دا محصلش أصلاً يا حلا مش أنا خالص اللي أوعد وأخلف….. الحقيقه إني احترمت كلامي معاكي ووعدتك أشيل مشاهد تانيه طلبتيها وشيلتها بالفعل وشكرتيني عليها ولو حابه تفتكري المشاهد اللي اتشالت بعد إذنك روحي شوفيها في المونتاچ عند الأستاذ عمرو عاكف أو كلميه يبعتهالك كلها موجودة».
وأضاف تامر في تدوينة له: «وبعدين الفيلم بقاله ٣ أسابيع في السينمات والكليب موجود جوة الفيلم هو بالنسبالك الحرام إننا ننزل الكليب على اليوتيوب بس!!، إنما الكليب يتشاف جوه السينمات عادي؟ منطق غريب فعلاً يا حلا، وبعدين هو مش أنتي اللي مضيتي عقد وتقاضيتي عليه مبلغ كبير عشان الدور دا بعينه !!!!! هو مش إنتي اللي صورتيه ومثلتيه بنفسك وبمنتهى الرضا ولاّ حد أجبرك؟!!!!!!، وللتوضيح للجمهور الكريم أنا والمخرجة الأستاذة سارة وفيق بعتنالك وكنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظة تقوليها، ماكنتيش بتردي علينا وتليفوناتك كلها كانت بتقفل في وشنا».
وقال تامر: «إنتي للأسف يا حلا متعاملتيش صح مع الموقف كان لازم تهتمي بأمرك أكتر من كدا ولو كان ليكي أي طلب تاني كنت هعمله بكل حب إنما إنتي فجأه أختفيتي ومكملتيش تركيب صوتك في الفيلم ولا جيتي تتصوري عشان آفيش الفيلم أصلًا ومخليتيناش نعرف نعمل آفيش مجمع !!! وبقيتي تقفلي تليفوناتك وتكنسلي علينا كلنا وبعدين أي فيلم بيبقى ليه خطه مسبقه في الدعاية وانتي عارفاها كويس ووافقتي عليها ودا كليب رومانسي يعني معقول كنتي عايزه المنتج يشيل كل مشاهدك اللي صورتيها من الكليب ويطلعني بغني وبقول الكلام الرومانسي دا للأستاذ ماجد الكدواني مثلاً هو دا يُعقل ؟؟».
وتابع: «أنا زعلان منك جداً يا حلا على مفردات البوست بتاعك الغير موفقة ومستحيل هرد بطريقتك اللي فيها تجريح واتهامات باطله ليا إحتراماً لحجات كتير يمكن فايتاكي بس مش هتفوتني وعلى فكرة أنا واثق انك عارفة اني مستاهلش منك كدا وهكتفي بالتوضيح دا وربنا يهدي الجميع ويكتبلك كل الخير اللهم آمين».
كانت الفنانة حلا شيحة عادت لإثارة الجدل بعد إطلاقها تصريحات عنيفة عن الفن والفنانين عقب أشهر من زواجها من الداعية معز مسعود.
وهاجمت حلا شيحة، الخميس، الفنان تامر حسني وفيلمه الجديد (مش أنا) وأعلنت تبرؤها من الفن.
وقالت حلا شيحة، في حسابها على موقع «انستجرام»: تفاجئت بكليب يجمع فيه مشاهد متفرقة من الفيلم وفي أيام ذي الحجة أيام مباركة، خصوصا بعد وعد تامر حسني ليا وتأكيده إنه حيحترم رغبتي وبعض الطلبات اللي طلبتها منه بكل احترام وود.
وتابعت: إحنا يمكن نجحنا بمقايس الدنيا بس صدقوني بمقايس ربنا إحنا لم ولن ننجح، أنا عارفة ومتأكدة إن زملائي جواهم خير بس للأسف فتنة الشهرة والنجاح مش بتخلينا نشوف ونقيس الأمور صح، بتكلم من قلبي الكليب ده ميرضيش ربنا وأنا عيطت لإني شوفت نفسي في المشاهد دي، دي كانت زلة نتيجة ظروف مريت بيها وكلنا بنغلط ولازم نغلط علشان إحنا بشر بس المصيبة إننا بنغفل وبننسى.
وأضافت حلا شيحة: أنا مش حتكسف من حد أنا توبت من المشاهد دي وهي لا تصح وأنا غلطت وبصلح وأهم حاجة إن ربنا يرضى عني لأن في الأخر ده اللي حينفعنا مش الشهرة ولا النجاح لا هو مش نجاح أصلا علشان النجاح الحقيقي حاجة تانية خالص إحنا أغلبنا ناسينها إلا القليلين منا.
وقالت الفنانة: الفن لو بيخلينا نبعد عن منهج ربنا ومنبقاش قدوة لولادنا يبقي باطل وميبقاش فن، إحنا كلنا عندنا امتحان في الدنيا دي.
كانت حلا شيحة خلعت النقاب وأعلنت عودتها إلى مصر ورغبتها في العودة إلى الفن مرة أخرى قبل عامين، بعد سنوات طويلة من الزواج والاعتزال والنقاب والإقامة خارج مصر، ورحب الكثير من جمهورها بهذا القرار عقب طلاقها وعودتها لمصر، واستقبلها المنتجون والمخرجون والفنانون وقدمت عددا من الأعمال الفنية وحضرت عددا من المهرجانات قبل أن تعلن زواجها من الداعية معز مسعود لتعود بعدها مرة أخرى إلى الابتعاد عن الأضواء، ثم إلى تصريحاتها الأخيرة والتي تتبرأ فيها من الفن مرة جديدة.
وعبر عدد من الفنانين عن انزعاجهم من تصريحات حلا، وطالبوها بالتوقف عن التصريحات المستفزة، وقال المخرج ماندو العدل: لما تتطلقي متقوليش عايزة أمثل.
وجهت الفنانة راندا البحيري، انتقادات لاذعة لزميلتها حلا شيحة، التي هاجمت تامر حسني بسبب فيلم «مش أنا» وفيديو كليب أغنية «بحبك» للترويج للفيلم.
وكتبت راندا، عبر حسابها على موقع التواصل الاجتماعي «فيس بوك»: هو محدش قال لحلا إن باب التوبة مش موجود على الإنستجرام؟، هو برضه اللي مضطرب؟ لالالا، والله كانت صعبانة عليّ في الأول، بس كده صعب أوي حد ياخد بقي منها الموبايل بسرعة.
وتابعت راندا البحيري: فتاتي إزاي تكوني داعية بمنتهى السهولة وتنصحي زمايلك وتنتقديهم في يوم وليلة؟.
وأضافت: عريس وطرحة اتنين متر وفرح، بس بقى من تاني يوم حضرتك تقدري كده تبقي رئيسة مجلس إدارة العالم وتقولي مين هيدخل الجنة ومين لاء، ده بتقولك إحنا بمقايس ربنا لم و(لن) ننجح والعياذ بالله إن شاء الله إنتِ.
وتابعت راندا البحيري: هو محدش فهمها إن اللي بتعمله ده ممكن يعرضها للمسائلة القانونية وإنها بتضر بسمعة فيلم وبالتالي إيراداته؟ وبتتكلم عن ممثل ونجم بحجم تامر حسني بالشكل ده أكنها أحسن منه، وإحنا كلنا عارفين الخير اللي بيعمله تامر طول عمره في الخفا وفي العلن على إيدينا كلنا، فضله على ناس كتير أوي و ربنا جعله سبب لفتح بيوت أد كده، تقوم دي تنصحه؟ لا والله هم يضحك.
بدورها قالت الفنانة إلهام شاهين، إنها تحترم آراء الجميع ولا تحجر على الآخرين، مشيرة إلى أن كلمات حلا شيحة في حق الفن ترجع لقناعاتها الشخصية وبالتالي هي حرة فيما تقوله أو تفعله، ولكن في المقابل عليها هى الأخرى أن تحترم زملاءها ولا توجه لهم كلاما جارحا، على حد تعبيرها.
وأضافت شاهين في تصريحات صحفية أن الفنانة حلا شيحة ليس لديها انتماء للفن، بدليل اعتزالها ثم عودتها ثم تصريحاتها الأخيرة. وتابعت: هي لديها نزعة دينية خاصة نحترمها، وهي حرة في تصرفاتها وتعمل ماتريده في حياتها، وفي المقابل عليها احترام الآخرين واحترام الوسط الفني طالما اعتزلته.
وقالت إلهام شاهين: لا أريد الخوض في تفاصيل ما قالته حلا شيحة، ولكن كل ما أقوله لها: (لو مش بتحبي الفن خلاص سبيه وأبعدي عنه بهدوء) أسوة بنجمات كثيرات فعلن ذلك، دون التجريح في من يعمل به.
وأضافت: اللي مش بيحب الفن خلاص هو حر الفن كمان مش هيحبه، وكل شخص حر في تصرفاته، وهي حرة فيما تقوله وتريده وعليها ألا تعطي نصائح لأحد لأن الفن لا ينتظر النصيحة، لأن كل شخص لديه قناعاته الشخصية التي يؤمن بها وكل شخص يحاسب نفسه فقط على ما يقدمه وما يفعله: «يعني أنا أنصح نفسي فقط وليس لي علاقة بتصرفات الآخرين، ومفيش داعي للتجريح في حد».
