بعد لقاء مع أبطال فيلم “ريش”| فنانون ومدونون يشنون هجومًا حادًا على الإعلامية بوسي شلبي: عنصرية وطبقية وتعالي بلا مبرر
بوسي شلبي خلال لقاء مع دميانة نصار: الفيلم فتح باب رزق لعيلة مكانتش تقدر توصل خالص للمكان اللي احنا فيه دا
الفنان حسني شتا: مينفعش تكوني مذيعة لأنك معدومة الإنسانية.. ومحمد عبدالعظيم: بصتلي من فوق لتحت وقالتلي مش هينفع أعمل معاك حوار
كتب – أحمد سلامة
شن رواد مواقع التواصل الاجتماعي هجومًا حادًا على الإعلامية بوسي شلبي، بسبب ما وصفوه بـ”العنصرية” و”الطبقية” التي أظهرتها خلال حوار أجرته مع فريق عمل فيلم “ريش”.
خلال مقابلة مع بطلة الفيلم دميانة نصار حنا، قالت الإعلامية بوسي شلبي “برضو أنا بقول عُمر الرشيدي -مخرج الفيلم- غيّر مصير ناس عن طريق الفيلم دا لأنه فتح باب رزق جديد لعائلة من المنيا”، ثم أضافت وهي تشير إلى بوابة المسرح الرئيسي للمهرجان “عيلة مكانتش تقدر توصل خالص للمكان اللي احنا فيه”.
واعتبر رواد “السوشيال ميديا” أن ما قالته بوسي شلبي هو إهانة وعنصرية وطبقية ضد أبطال الفيلم، لكونهم من طبقات الأقل حظًا من المال والشهرة، منتقدين في الوقت ذاته فكرة التعامل مع الفن باعتباره “باب رزق” أو “صدقة مخفية” ضد أسرة تعاني من ضيق ذات اليد.. مبررين ذلك بأنه لو لم يكن فريق العمل من “الموهوبين” الذين لم يحصلوا على حقهم في فرصة الكشف عنهم لما حقق الفيلم جوائز دولية لم تحققها أكثر الأفلام المصرية إنتاجًا وأكثر الممثلين المصريين شهرة.
وعبر صفحته على موقع التدوينات القصيرة “تويتر”، شن الفنان الشاب حسني شتا، هجومًا حادا ضد بوسي شلبي بعد تجاوزها ضد بطلة فيلم ريش، قائلا: “كفاية عك وقرف بقي وعنصريه وعنجهية”.
وكتب حسني “مذيعة إيه وإعلامية إيه بس! إيه العبث اللي احنا فيه ده! بوسي هانم إنتي فعلا اللي مينفعش تكوني ولا تحلمي تكوني مذيعة لسبب واحد إنك معدومة الإنسانية”.
أما الفنان محمد عبدالعظيم، فقد ألمح إلى أن ذلك التعالي الصادر عن الإعلامية المعروفة ليس الأول من نوعه، لافتًا إلى أنه هو شخصيا تعرض لطريقة تعامل جافة تشبه تلك الطريقة التي تعرض لها أبطال “ريش”.
وكتب عبدالعظيم على صفحته على موقع التواصل الاجتماعي “فيس بوك”، “كنت لابس بدلة شيك بـ 3000 جنيه عليها تخفيض كبير، وكنت مستحمي وحالق دقني وواحد من أبطال أحد الأفلام”.
ويضيف عبدالعظيم، أحد أبطال مسلسل “بـ 100 وش” للمخرجة كاملة أبوذكري، “الهانم رفضت تعمل معايا لقاء علشان متعرفش (مين دا)، ولما قالولها ده من أبطال الفيلم، بصتلي من فوق لتحت وقالت برضو لأ”.
الفنانة سارة نخلة كتبت عبر موقع فيس بوك مشيرة إلى الراحل الفنان محمود عبدالعزيز زوج الإعلامية بوسي شلبي “الله يرحمه بس لغاية اللحظة دي بتشتغلي على حسه، لو شافك بتتعاملي ازاي كان أول واحد هاجمك، الإعلام برئ من مذيعة زيك مش عارفة بتشتغل إيه ولا ليه”، مضيفة “تنمر وقلة أدب”.
صفحة باسم “ميمز لا تخضع للصوابية السياسية”، أعادت نشر مقطع الفيديو لـ بوسي شلبي وغردت بالقول “الألفاظ مع طريقة الكلام مع حركة الإيد بتعبر عن مستوى جديد من الرداءة الإنسانية (قبل أن تكون مهنية) مرشح للهبوط أكثر فى الفترات القادمة”.
وقال حساب باسم روجي الصاوي “إيه كمية العنصرية! مش فاهمين إيه هي قيمة المكان اللي انتوا فيه؟ تكنشي دي الجنة واحنا مانعرفش يا هانم!”.. وأرفق الحساب بالتدوينة وسم #بوسي_شلبي_متنمرة_وعنصرية.
أشرف محمود أحد رواد موقع تويتر كتب يقول “بوسي شلبي ترجمت زعلهم من الفقراء بالتعالي على بطلة الفيلم، وتذكيرها بالأمله اللي هي فيها بعد انتقالها من الصعيد المعدم ودخولها للجمهورية الجديدة اللي مفيهاش فقرا”.
وتساءل هشام خضري “مش المفروض إدارة المهرجان تطلع بيان اعتذار للممثلة دميانة وفريق العمل بعد الإساءة اللي حصلت من المدعوة بوسي شلبي ولا حضرتك هتعمل مش شايف وهتراعي خواطر الأصدقاء يا بشمهندس”، في إشارة للمهندس نجيب ساويرس.
بينما يقول يوسف خليفة “العنصريين من أمثال الفنانة بوسي شلبي مبيستفزونيش حقيقةً، من طريقتهم بعرف إن من جواهم عارفين قيمتهم المحدودة وعارفين الفراغ اللي في حياتهم وبيحاولوا يناقضوا ده ويحسسوا نفسهم بالتميز عن طريق الكلام والأفعال العنصرية المباشرة، فالحوار بالنسبالي بيبقى مضحك فشخ”.
