السيسي يهنئ الأقباط بعيد الميلاد ويقول للمصريين من كاتدرائية العاصمة الإدارية: الجمهورية الجديدة تتسع للجميع و«اوعوا حد يفتنا».. (فيديو)
السيسي: ربنا يعيني أني أكون خادم أمين شريف للبلد.. ولازم تعرفوا إن اللي حامي البلد دي ربنا سبحانه وتعالى
زار عبد الفتاح السيسي، رئيس الجمهور، مساء الجمعة، كاتدرائية ميلاد المسيح بالعاصمة الإدارية الجديدة، لتقديم التهنئة بعيد الميلاد المجيد، حيث كان في استقباله البابا تواضروس الثاني بابا الإسكندرية بطريرك الكرازة المرقسية
ولدى وصوله، هنأ السيسى، الإخوة المسيحيين مصر بمناسبة عيد الميلاد المجيد، وقال في كلمة للحاضرين في قداس عيد الميلاد: “كل سنة وأنتم طيبين وإن شاء الله دايما تبقى سنة جميلة علينا كلنا وسنة طيبة علينا كلنا وخير وسلام وأمان ورحمة ونعمة من الله سبحانة وتعالى”.
وأضاف السيسي: “أنا بتكلم من خلال الفرصة دي بكلم كل المصريين وبقول إن أحنا في مصر بدأنا طريق.. طريق عاهدنا فيه ربنا وعاهدناكم.. بدأناه مع بعض وإن شاء الله هنكمله مع بعض.. مع بعض كلنا”.
وتابع: “الطريق ده زي ما بنقول كده وسمعتم يمكن طريق الجمهورية الجديدة اللي تتسع للجميع.. تتسع لينا كلنا بدون أي فرق أو تمييز.. للجميع نعيش فيها في سلام وأمان مع بعض.. وخلو بالكم أنا بقول الكلام ده لكل الناس لكل المصريين مش لحد بعينه.. اوعوا حد يدخل بينا اوعوا حد يفتنا لأن ده مش هينتهي”.
وقال السيسي: “ربنا يعيني أني أكون خادم أمين شريف للبلد دي وليكم.. يارب يعيني على كده”.
وأضاف: “انا في بيت من بيوت ربنا، ولازم تعرفوا إن اللي حامي البلد دي ربنا سبحانه وتعالى.. دايما ندعوه ونتوسل إليه ونرجوه أنه هو يحمينا ويهدينا ويكمل لنا هو ربنا وبيسببب الأسباب.. أه بيسبب الأسباب”.
وواصل: “مش عايز أطول أكتر من كده لكن عايز أقولكم إن الجمهورية الجديدة دي جمهورية الحلم والأمل.. جمهورية العلم والعمل.. الجمهورية القادرة وليست الغائمة.. المسالمة وليست المستسلمة.. الجمهورية دي هنبنيها مع بعض.. أي تحدي أي صعاب تهون لو احنا كلنا على قلب رجل واحد.. كلنا مع بعض، فكل عام وأنتم بخير ومصر بخير والدنيا كلها بخير”.
وتابع: “كنت أتمنى أني اسلم عليكم كلكم واحييكم كلكم واهنيكم كلكم لكن يعني ربنا سبحانه وتعالى يزيح عنا الجائحة ويحمينا ويحميكم”.
ووجه في ختام كلمته التهنئة إلى قداسة البابا وقال للحاضرين: “أنا عايز أقولكم على حاجه بقى.. أنتم متعرفوش حجم التقدير والاحترام والمحبة اللي أنا بكنة لقداسة البابا.. خلي بالكم.. الرجال بتوزن بالمواقف والظروف الصعبة جدا.. واحنا مش عايزين نقلب كلام ملوش لازمة لكن قداسة الباب يعني.. انتم كمان تخلي بالكم منه”.
