السيسي من المنيا: الحكومة مش الناحية التانية.. صدقوني في 2013 أنا كنت شايف كويس أوي إيه ممكن يحصل
بندير الأمور بإخلاص وأمانة وبشرف في وقت عز فيه الشرف.. وهناك دولًا مازالت متضررة من الأوضاع في 2013حتى الآن
كتب: عبد الرحمن بدر
قال الرئيس عبد الفتاح السيسي: “الحكومة مش الناحية التانية وده أمر خطير اتعمل خلال السنين فاتت، وهو اللي أدى لمشكلة في 2011، الحكومة في حتة وبقية الشعب في حتة، فبقت الحكومة عدو، والعدو نهده، الحكاية اتعملت كده، لو ماخدناش بالنا”.
وتابع خلال تناول الإفطار مع أهالي قرية المعصرة بالمنيا: “الجهاز الإداري فيه 6 ملايين يعني 6 ملايين أسرة يعني 30 مليون مواطن، لو الأسرة 5 أفراد أب وأم من 2 – 3 أطفال.. 30 مليون، طب النهارده هنا في موظفين قاعدين معانا طبعًا، فيه هنا مسؤولين أكيد، انتى تقولي بقي هننتهز الفرصة إنك موجود وأكد على كل مسؤول معانا في المنيا يخلي باله من شغله.. يبقي احنا كده بنتكلم كلام مناسب للظروف الحياتية بتاعتنا”.
وأضاف: “كمان نقول لبعضنا هنا، إن أخويا وأبويا وابني اللى شغال في مكان ما، البلد محتاجة إخلاصك وأمانتك وعملك، الإخلاص والأمانة والعمل، وانتوا بتشوفوا دول أكبر مننا وأغلى مننا، أتمنى من الله نفضل متماسكين شعب ودولة، واحنا من جانبها دولة تخفيف ما أمكن على الناس”.
وقال السيسي، إن هناك دولًا مازالت متضررة من الأوضاع خلال عام 2013حتى الآن.
وأضاف: “كنت بقول للسيد المستشار أبو الشهيد ووالدته خلال التكريم إنه بيقول في 2013.. في أعقاب اللى حصل ساعتها ومحاولة تخريب الدولة وتدميرها هو مش فيه دول تانية من غير ما نقول أي حاجة مازالت متضررة من اللى حصل ومازالت تعاني من اللى حصل”.
وتابع: “صدقوني أنا كنت شايف كويس أوي إيه ممكن يحصل، شايف الخطر والترتيبات وكل حاجة”.
وأضاف: “ربنا أراد الدولة بناسها وكل شهيد من كل أسرة مصرية يكون هو الساتر الحاجز بيقدم نفسه علشان احنا كلنا بخير وسلامة وربنا أراد ونجينا منها، طب بعد ما نجينا من ده كله حد يكون قلقان من حاجة تانية، ممكن لا، مفيش خوف ولا قلق، بندير الأمور بإخلاص وأمانة وبشرف، في وقت عز فيه الشرف”.
