السيسي: كل تعدي على الأراضي الزراعية هيتشال ويرجع كما كان من 30 سنة.. كل حاجة غلط فيكي هتتشال طول ما أنا موجود
كتب-عبد الرحمن بدر
قال الرئيس عبد الفتاح السيسي: أي تعدٍّ على الأراضي الزراعية هنشيله وهندفعك ثمن شيله، إحنا بنتكلم عن دولة بتحترم نفسها وتحترم شعبها.
ووجه بإزالة كل التعديات إلى ما قبل 30 عاما مضت، مضيفا:6 شهور وكل حتة زى ما كانت من 30 سنة مش قبل 2011 .. لا لا.. من 30 سنة كانت نظم الرى والجسور إزاى، هتتشال كل حاجة غلط فيكى، طول ما أنا موجود فى مكاني هنا.
وتابع السيسي، خلال افتتاح محطة معالجة مياه بحر البقر: لازم نحافظ على اللي عندنا؛ لأنه مش كتير عشان نضيعه، قدامنا شهور قليلة، ويكون المطلوب في المرحلة الثانية نقل المياه إلى الأراضي المستهدف زراعتها، بنتكلم في حدود 500 ألف فدان.
وأضاف: بنقول للمواطن اللي عايز يزرع، تعالَ اشتغل، مش هنكلفك أي حاجة تانية.. الفدان بيتكلف 300 ألف جنيه عشان يبقى قابل للزراعة، تكلفة الأرض وشبكة المياه والكهرباء والطرق، أو تسوية الأرض، الموضوع على بعضه بالحسابات والحرص الشديد بنقول 300 ألف جنيه لكل فدان، مين كان من المواطنين ينفق ده عشان يجيب 15 ألف جنيه، لو اتحطوا في البنك كانوا جابوا 30 ألفًا.
وقال السيسي، إن الدولة جلست مع الشركات التي تنتج الطلمبات الخاصة بمحطات الرفع وضخ المياه من أجل تخفيض الأسعار، يا مصريين شوفوا الحاجة بتتعمل إزاى؟، بنفاصل مع الناس علشان المقاولة كلها تتخفض والعمل اللى بيتعمل على الأرض وشبكة الكهرباء والمحولات عمل كبير قوى فوق الخيال..عاوز أخليكم تفرحوا بقدراتكم، واللى بيتعمل والله العظيم حلم وكرم كبير قوى من ربنا علينا علشان نعمله باقى إن إحنا نزرعه.
