السيسي عن انتقادات الطريق الساحلي: ناس بتحاول تحط تراب على شغلكم وكأننا مش عارفين نعمل حاجة (فيديو)

أنا مستغرب القائمين على الطريق مش قادرين يوصلوا إنه مخلصش والإرشاد والتخطيط بتاعه لسه وبالتالى الحكم مش مظبوط

خطة تطوير الطرق فى القاهرة منعت إصابتها بالشلل المروري وحجم العمل اللى اتعمل غير مسبوق وبتكلفة كبيرة جدا جدا  

قال الرئيس عبد الفتاح السيسى: “أنا متابع لأى شكوى وبأى شكل من الأشكال، زى الطريق الساحلي، وأنا بس عاوز أقول إنه المفروض أن الطريق ده يخلص 30/7 أو منتصف شهر 8”. 

وأضاف خلال تفقد الأعمال الإنشائية لتطوير عدد من الطرق والمحاور بالقاهرة الكبرى: “الطريق لما ينته بكل الشغل الفنى اللى عليه، ثم بيتعمله الإرشاد اللازم، ثم تتحط عليه عناصر الشرطة لضبطه زى ما إحنا عاوزين”. 

وتابع:”معقول طريق كان حارتين ولا 3، زى طريق بقى عرضه 6-7 حارات، انتظروا لما الموضوع يخلص ويتشرح لكم، أنا مستغرب جدا القائمين على الطريق مش قادرين يوصلوا أن الطريق مخلصش والإرشاد والتخطيط بتاعه لسه مخلصش، وبالتالى هيبقى الحكم مش مظبوط، هو احنا هنعمل الطريق على قواعد المرور.. ولا هنعمله وفق أسلوب الناس فى الحركة.. لا قواعد المرور يا جماعة ولازم كلنا نتفق على كده”. 

وقال السيسي: “كل الشغل فيه ناس تقعد تشكك فيه، وبقول الكلام دلوقتي، تشكك وتسيئ إليه بعد كل الجهد ده والتكلفة دي، ودى ناس بتحاول تحط تراب على شغلكم، مش الهيئة الهندسية ولا وزارة النقل، لا ده على مصر، وكأننا مش عارفين نعمل حاجة”. 

وتابع: “الداخلية هتبقى موجودة، وتخطيط الطريق هيتعمل وفق معايير الجودة العالمية، وإحنا كمواطنين هنستخدم الطريق وفق القواعد دى”. 

وقال إن العمل على تطوير الحركة بالقاهرة الكبرى يتم وفق خطة متكاملة، مضيفا: “يهمنى أن الناس فى مصر تعرف وتحديدا فى القاهرة – اللى فيها أكبر كتلة حركة فى مصر كلها بالكامل-، إننا اشتغلنا بخطة متكاملة”. 

وتابع، أنه وفق خطة تطوير الحركة المرورية فى القاهرة الكبرى يتم تسهيل حركة السيارات لمدة 10 سنوات قادمة، وفق الخطة دى فى النهاية نقدر نقول إن القاهرة سواء شرق القاهرة أو غرب القاهرة حلينا فيها حركة العربيات يمكن لغاية 5 – 10 سنوات قادمين.  

وأضاف السيسى: “الناس لازم عارفة وسامعة الكلام ده دلوقتي، كان الطريق الدائرى الفاصل ما بين القاهرة الجديدة وشرقا وبقية القاهرة، وعملنا 16 محور للربط بين شرق القاهرة بالجزء اللى هو فى غرب القاهرة بالكامل، لما خلصنا ده اشتغلنا فى كل المحاور الداخلية وخلينا الحركة فيها يسيرة”. 

وقال السيسى، إن خطة تطوير الطرق فى القاهرة منعت إصابتها بالشلل المرورى، لو مكناش عملنا الكلام ده خلال الـ 4- 5 سنوات اللى فاتوا كانت القاهرة أصيبت القاهرة بالشلل الكامل، وحجم العمل اللى اتعمل فى هذا المجال غير مسبوق وبتكلفة كبيرة جدا جدا ولكن فى النهاية النتائج فى الحركة، قلة التلوث، وتوفير وقت الناس وتوفير الوقود والتيسير على الحركة بقت ضخمة جدا”. 

وتابع: “لما خلصنا القاهرة الجديدة ثم المحاور الرابطة ثم غرب القاهرة والدائرى مثل الميثاق وسميرة موسى وعمر سليمان والكلام ده كله، دخلنا فى اتجاه الجنوب، الجنوب زحمة، الجنوب زحمة، مهم نقول أن المقطم فيه كتلة سكانية كبيرة، الكتلة كانت بتتحرك إزاى، فيه فرق بين التحرك ببطء شديد أو التحرك بانسيابية”.  

وطالب السيسى، القائمين على تنفيذ مشروعات الطرق والكبارى بالتحدث مع المواطنين، قائلا: “لازم نتكلم مع الناس ونعرفهم علشان يعرفوا إحنا بنعمل إيه، ولا تتعجلوا النتائج، ولما اتعملت المشاريع كلها الناس حست اللى اتعمل كان إضافة كبيرة جدا وعمل لهم تيسيرات كبيرة، وبنحاول بقدر الإمكان فى أقل وقت ننجز المشروع”.  

وتحدث السيسى، عن محور جديد يتم تنفيذه يسهل حركة المواطنين فى الوصول إلى القاهرة الجديدة بداية من كوبرى السيدة عائشة، حيث أنه مواز لطريق صلاح سالم. 

وقال: “المحور ده موازى لطريق صلاح سالم يا جماعة، يعنى أنا النهارده علشان أخليك تطلع على كوبرى السيدة عائشة على القلعة وتروح داخل على صلاح سالم للآخر أو تخش على طريق السكة البيضا، أنا عملت محور جديد أخليك تدخل منه لغاية القاهرة الجديدة من المحور ده”.  

وتابع: ده حاجة تانية خالص وإضافته وتيسيره الحركة بشكل مسبوق، والكلام ده بيتعمل بتكاليف كبيرة، ولكن بيسهل الحركة ويوفر الوقود ويوفر فرص ويساهم في القضاء على التلوث، هتلاقي أراضي هنا غير متاحة بقت متاحة وممكن نعمل خدمات للناس اللي موجودة، زى طريق الكورنيش قولت لهم وسعوا على الناس واعملوا كورنيش جميل لإسعاد الناس فى المقطم، عايزين ننجز، واعرضوا عليا تخطيط شارع 9″.