السيسي: بقول للمستثمرين أنتو بتحطوا إيديكم في إيدين دولة بتكافح علشان تحط نفسها على خريطة الدنيا
كتبت: ليلى فريد
قال الرئيس عبد الفتاح السيسي: “بدأنا نعمل حاجة مش في ظروف عادية خالص، وخاصة ميناء دمياط وحجم قضايا التحكيم اللي إحنا دخلنا فيها نتيجة أحداث 2011، طب أنا بقول كده ليه، بقول للمستثمرين بصوا أنتو بتحطوا إيديكم في إيدين دولة بتكافح علشان تحط نفسها على خريطة الدنيا، الناس كانت بانية عمارة ومدرسة جوه الميناء”.
وتابع خلال افتتاح ميناء الإسكندرية: “أنا يهمني أقول التاريخ علشان تعرفوا إزاي، لما رحت جرجوب أنا ماشفتش ده، ولما رحت برنيس ما اتعذبتش ولا صرفت أكتر من أن أعمل المنشأ نفسه، أصعب حاجة إنك تخش على مكان حصل فيه تشويه كبير جدا وبتواجد لناس وانت مضطر تمشيهم، لما تمشيهم ماتظلمهومش وتصرف كمان، علشان ميناء الإسكندرية يبقى بالمستوى ده ويكون درة مصر، إحنا بنتكلم في أرقام كبيرة جدًا جدًا علشان بس تسوية الموضوع، فيه تفاصيل كتير جدا جدا”.
وأضاف: “أنا لما بكلمكم كده يا مصريين علشان تعرفوا يعني إيه دولة، والدولة مش أكل وشرب، الدولة حاجة تانية خالص غير اللي إحنا بنتكلم فيه علشان كده بكتر في الكلام”.
وقال السيسي، إنه يتم منح الفرصة لكل الناس تشغيل المشروعات، مبينا: “إحنا قلنا لكل الناس إحنا هنعمل حاجتنا ونطرحها تيجي تشغلها، وندي الفرصة للجميع”.
وأضاف: “لما كنت أطلب من مستثمر واحد إنه يجي ويعمل الحاجة شيء، وإن أقول للناس عندي مكان جاهز للشغل حاجة تانية، وفي النهاية بمنح الفرصة لمشغلين آخرين لو كانوا مهتمين يجوا يتفضلوا، والكلام ده هتلاقوه في الإسكندرية وأبو قير والعريش وجرجوب والسخنة”.
