السيسي: الـ 100 مليار اللي كنا بنحلم بيهم مجوش لدلوقتي وبقول لمدبولي شوفوا وسيلة أخرى تضيف لصندوق تحيا مصر.. محتاجين نسعد الناس
كتب: عبد الرحمن بدر
قال الرئيس عبدالفتاح السيسي خلال احتفالية أبواب الخير، اليوم الأحد: “عاوز أقولكم إنه لغاية دلوقتى الـ 100 مليار اللى كنا بنحلم بيهم مجوش لغاية دلوقتي، وعلشان كده بقول للدكتور مصطفى لازم تشوفوا وسيلة أخرى تضيف للصندوق أكتر من كده سواء من تبرعات الناس أو موارد نقدر نحشدها علشان فيه دور كبير في ظروف زى الظروف اللي بتمر بالمصريين”.
وأضاف: “صندوق تحيا مصر تحت المسؤولية المباشرة ليا، يعنى الجنيه مبيطلعش كده، دى طبيعة عندى يعني صعبة قوى، لازم أصدق علشان الفلوس تطلع، علشان تبقوا مطمنين أن أموالكم إن شاء الله بين أيد أمينة يتم إنفقاها وفق دراسات وتصور للتخفيف من مشاكل وقسوة الحياة على الناس في مصر”.
وتابع السيسي: “نتمنى إن الصندوق يكون له أعمال بر تمتد خارج مصر إن شاء الله”.
وأكد السيسي، أن الجهد الذى يبذله صندوق تحيا مصر هو جهد منظم، مضيفا: “أد إيه واصل للناس الجهد ده، لأنه جهد منظم ومخلص وكبير، لما جينا نعمل صندوق تحيا مصر ونجمع فيه أموال تكون وسيلة إضافية لقدرة الدولة مع منظمات المجتمع المدني لتنظيم العمل الخيرى والتحديات اللى بتقابل الناس فى كل حتة فى مصر”.
وواصل: “أد إيه محتاجين نسعد الناس ومحتاجين نطور أكثر من كده فى الممارسة.. دخلنا في موضوع الإسكان وحاولنا نحل المسالة بشكل أفضل وحقق نجاح ومستمرين فيه.. واتكلمنا في المبادرات الصحية المختلفة وممكن الصندوق يساهم فيها ونجح فى مساعدة الغارمين بالمساهمة مع مؤسسات المجتمع المدني.. في الخير بنبقى عشمانين أكتر وكل ما تكون قدراتنا المالية كبيرة كل إما نقدر نعمل أكتر”.
وتابع السيسي: “جمعيات كثيرة تقوم بتوزيع سلع ومشروعات صغيرة ومتناهية الصغر على الناس، وبقولكم لو احنا قدرنا نساعد أسرة من احتياج شديد لتلبية احتياجاتها من دعمنا يبقا عملنا حاجة جميلة قوي، بتوزع رؤوس ماشية في الريف، طيب احنا بنديهم راس ماشية تجيب ايه؟، هتقولى ده كويس قياسا بالظروف، طيب أي نوع رأس ماشية، فيه رأس ماشية تجيب 40 كليو لبن طيب أنا بديهم اد ايه؟، اللى انا بقول عليها غالية بس هتعمل ايه؟، بتاكل وتشرب زى العادية، يا ترى احنا نقدر نعمل ده بحيث لما ندى راس ماشية من النوع ده تفرق معاه كتير قوى”.
