السيسي: الدول اللي بتقول مبتدوش حقوق للناس حقوق إيه؟ أنا مش لاقي أكل.. علشان أفتح شارع بشيل بالألف بيت وعمارة
السيسي: عندنا 500 مستشفى وعاوزين نضاعف العدد.. هو أنا مش عاوز أدي الطبيب مرتب كويس؟
كتبت: ليلى فريد
تحدث الرئيس عبد الفتاح السيسي، عن انتقادات بعض الدول لمصر بملف حقوق الإنسان، قائلا: “الدول اللى بتقول مبتدوش حقوق للناس، حقوق إيه؟ أنا مش لاقى أكل، مش لاقي أشغل، مش عارف أسكن روحوا المرج والمطرية والخصوص، لما بمنشى في الشوارع الاقى إيه؟، هي دي بلادنا اللى في رقابتنا يا كل المسؤولين والإعلام والصحة والتعليم والجامع والكنيسة انزلوا شوفوا البلد عاملة إزاى؟”.
وتابع السيسي في كلمته خلال تدشين مشروع تنمية الأسرة المصرية:”علشان أفتح شارع بشيل بالألف بيت وعمارة علشان الناس تمشى فى حتت ما مبيتمشيش فيها.. أنت جاى تعمل إيه؟.. إيه حكايتك النهاردة، لا والله أنا بقولكوا علشان البلد دي بلدنا”.
وأضاف السيسي: “البلد دى بلدنا كلنا، مش بتاعتى أنا بس، وأنا دائما أقول الأمن القومي والأمن القومي والأمن القومي في كل حاجة، الرعاية الصحية أمن قومي، التعليم أمن القومي، والدكتور طارق شوقي، وزير التعليم، خد على دماغه لما مات لما جيه يطور التعليم، انتوا عاوزين تعليم ولا مش عاوزين، لقاءاتنا دي توعية حقيقية لواقعنا، وإحنا مش بنكسف، انتوا قولتوا كلام مرتب هيفهموا ناس كتير، وفيه ناس كتير تانيين ممكن مش يفهموا الكلام، زى معدل النمو وغيره”.
وقال السيسي:”عاوزين نضاعف المستشفيات، عندنا 500 مستشفى، عاوزين ألف مستشفى، طب بكام، أنت كده عملت المكان بس، فين التشغيل والأطباء، الناس تسبلنا فرصة عمل في حتة تانية”.
وأضاف: “الطبيب هو أنا بديلو مرتب كويس؟، هو أنا مش عاوز أديلو مرتب كويس، أنا مش قادر اديلوا مرتب كويس، المدرس.. الدولة أنا مش قادر، وبالتالي التعليم اللى بيخرج جامعات حاسبات وكلية هندسة حاسبات، وعاء فيه 10 آلاف من الطلاب، ونقول نعمل الاختبارات الإلكترونية، وبنك معلومات ونظم معلومات.. علشان تتطور إيه البنية التحتية”.
