السيسي: التاريخ أكتر مادة كنت بحبها وأنا طالب لأنه مليان حكم ومواعظ
كتبت: ليلى فريد
قال الرئيس عبد الفتاح السيسي، الأربعاء، أكثر مادة كنت بحبها وأنا طالب هى التاريخ، لأن التاريخ مليان دروس ومواعظ كتير.
جاء ذلك في رده على سؤال الطفل صلاح ضمن النسخة الرابعة من “قادرون باختلاف”، وتابع السيسي: “كل القراءة كانت فى التاريخ، ده عبارة عن أنك عشت زمانين، الزمن اللى عشت فيه وزمان آخر بتقرأه حتى لو كان فيه أخطاء، وكنت بحب التاريخ”.
وأجاب السيسي على سؤال طالب ثانوي ع أصعب موقف مر به خلال عمل بالقوات المسلحة، قائلا: “أصعب وقت عليا كان فى 2011، والله يعلم ما فى نفسى فى اللى أنا بقوله ده، أنا كنت ببكى على مصر يا بني، كنت ببكى على مصر، حسيت أن ممكن أن الأمور تخرج عن السيطرة والبلد تخش فى دوامة كبيرة جدا من الخراب والدمار، وكنت عارف أن عدد مش قليل وظروفنا صعبة”.
وتابع: “كنت حاسس بالخطر الشديد ومن ساعتها لغاية دلوقتي دون مبالغة، وأنا فى الوقت ده مكنشى باين عليا سن خالص، أنا بكلمك بجد، هاتوا صورى فى الفترة دى قبل 2011، سنى لا يتخطى 30 عاما، لكن اللى حصل والخوف على البلد والناس”.
وقال السيسي: “يوم القيامة ولقاء ربنا سبحانه وتعالي، فى اليوم ده صدقنى وبكرة تشوفوا يوم اللقاء، إحنا اللى هنقول يا رب، إحنا لينا مكان معاهم لو قولتم آه هنيجي، ولو قولتم لا.. هيبقى موقفنا صعب”.
وأضاف: “الخوف على مصر دائم، لكن فترة 2011 و2013 و2013 و2014.. ولما حصل الموجة الكبيرة من الإرهاب.. وتفجير الكنائس والمساجد ومديريات الأمن.. الوقت ده كان أى حد يشوف مصر يقول خلاص، مش عاوز الذكريات تانى نفتكرها ونخلى بالنا، ولو ليا كلمة حافظوا على البلد دي”.
وقال السيسي: “لازم تعرف اللى حمى مصر ربنا سبحانه وتعالى، وأنا من الناس اللى ممكن شايفين حجم الدمار اللى البلد تدخل فيه لسنين طويلة.. 20 و30 و40 سنة الله أعلم، محدش حمى البلد إلا ربنا، البلاد اللى جبنا دخل ومش رجع، بلدنا ظروفها أصعب، ولو كان حصل شكل من أشكال الاقتتال فى 2012 و2013.. نقدر نقول أن الجيش والشرطة والدولة دفعت ثمن كبير أوي”.
