الحرية للمجهولين| خالد علي ينشر رسالة من زوجة مواطن محبوس: زوجي يعاني من اشتباه سرطان وأسنانه تساقطت بسبب ظلام الزنازين.. حياتنا اتدمرت

كتب – أحمد سلامة

نشر المحامي الحقوقي خالد علي، رسالة وردته من زوجة أحد المحبوسين احتياطيًا على ذمة القضية 330 لسنة 2022، والمحبوس فيها مواطن يُدعى أحمد محمد توفيق أحمد.

ووجهت زوجة أحمد توفيق، رسالة عبر المحامي خالد علي، قالت فيها “زوجي اسمه أحمد محمد توفيق، محبوس احتياطي، يوم 18 مارس 2022 الساعة 9 بالليل أخدوه من تحت البيت، هو معملش حاجة ولا ليه في أي حاجة، إحنا ناس بسيطة وزوجي طيب وسُمعته كويسة”.

وأضافت “زوجي بيجري على أكل عيشه عشان ابننا مريض توحد وعنده تشنجات حرارية ونقص أكسجين وكهربا ومش بيتكلم ومشاكل صحية أخرى في معدته”.

وتابعت “وزوجي مريض وعنده اشتباه في سرطان والغضروف وسنانه بتقع بسبب إنه مبيشفوش الشمس ولسانه متقطع وبيتهري وهناك مش عارفين يشخصه حالته والله العظيم يا أستاذ خالد زوجي معملش حاجه إحنا ناس في حالنا وأنا مش مصرية، أنا ليبية وأهلي كلهم في ليبيا وماليش حد هنا وقاعدين في إيجار جديد وأنا مركبه في إيدي مسامير وشريحة، كل حياتنا وقفت حتى علاج ابني المخ والأعصاب وجلسات الأكسجين ضغط عالي لان زوجي هو العائل الوحيد لينا”.