البياضي يرفض الحساب الختامي للموازنة: كفاية ديون.. الوطن لن ينصلح حاله إلا لما تعرفوا أهمية وأولوية التعليم والصحة
النائب: الحكومة أفقرت كل طبقات الشعب والمواطنين يعانون.. الحل في الاستثمار في البشر وليس الحجر
كتبت: ليلى فريد
قال الدكتور فريدي البياضي؛ عضو مجلس النواب، في تعليقه على الحساب الختامي لموازنة الحكومة ٢٠٢١/٢٠٢٢: “في كلمات مختصرة، أوجه كلامي للحكومة وأنا أرفض التقرير وأقول باختصار: كفاية كفاية ديون!.
وتابع في بيان له، الأربعاء: “غرقتونا وخنقتونا، الوزير بيقول أرقام ونسب وبيحاول يثبت أن نسبة الدين في تحسن، هذه الأرقام وهمية وأنا متأكد من ذلك لأن الـ٨٧٪ ليس فيهم ٢٤٪ ديون الهيئات الاقتصادية وتم حساب سعر الدولار على ١٨!، لو الوزير صح فإحنا اللي واهمين! والمواطن اللي بيعاني كل يوم وبيصرخ دا مواطن مش حقيقي!”.
وأضاف: “إحنا بنتكلم على إجمالي ديون تعدت الـ ١٠ تريليون وتجاوزت إجمالي الناتج المحلي وفوائد ديون بتاكل نصف المصروفات!، كفاية انتهاك للدستور، حرام عليكم انتم أقسمتم على احترامه! النسب اللي حددها الدستور للتعليم والصحة في ٢٠١٤ واللي مفروض تزيد كل سنة، الحكومة ما بتصرفش ربع النسب دي!، الوطن لن ينصلح حاله إلا لما تعرفوا أهمية وأولوية التعليم والصحة، وتعرفوا إن الحل في الاستثمار في البشر مش في الحجر!”.
واختتم: “كفاية على الحكومة، إحنا قدام حكومة لا تحكم، ولا تستطيع أن تحكم!، حكومة حققت العدالة الاجتماعية بأن أفقرت كل طبقات الشعب، بلا استثناء، من ٣ سنين تحت قبة المجلس طالبت وحدي بإقالة الحكومة، واليوم مع كثير من النواب ومع جموع الشعب نصرخ.. كفاية كفاية كفاية!”.
