أنغام: لم أتجاوز أزماتي مع والدي ووفاة أختي غنوة أصعب لحظة في حياتي.. وبنجذب للرجالة الغلط 

والدي بنى صورة مشوهة عني عند الناس والناس لغاية اللحظة دي بتعاملني على أساس الصورة دي والبعض بيستغلها ضدي 

وفاة أختي خبطة كبيرة وقاسية جدا مع إن علاقتنا مكانتش كويسة وغسلتها بإيدي وكنت عايزه أصحيها 

بعترف إني مكنتش حذرة في زيجاتي ومعنديش المقومات ومش هحب مرة ثانية أنا مش حمل أذية 

كتبت: ليلى فريد  

قالت الفنانة أنغام إنها تحاول طول الوقت تجاوز أزمتها مع والدها، الموسيقار محمد علي سليمان، لكنها لم تتمكن من ذلك حتى الآن. 

وتابعت خلال لقائها مع الإعلامي أنس بوخش في برنامج ABtalks: “بحاول طول الوقت أسامحه لكن صعب، ومش عايزة أقول كلام مش حاساه، ومش عايزة أكذب ومش مضطرة”. 

وأضافت: “هو بنى صورة مشوهة عني عند الناس، والناس لغاية اللحظة دي بتعاملني على أساس الصورة دي، وبعض الناس بيستغلوها ضدي، وعايشة في ده كل يوم”. 

وتابعت: “أنا واخدة قرار من زمان إني مش هصلح الصورة المشوهة دي، مش بسبب العند أو الكبر، لكن مش بحب أكذب ولا ألوم حد، ده قدر اتكتب عليا وأنا مسلمة”. 

وقالت أنغام: “في نعم كثيرة في حياتي عوضتني عن الظلم، مش محتاجة تعويض من حد، ولا إني أصلح صورتي أو أدافع عن نفسي، ربنا عوضني وبيعوضني كل يوم بما فيه الكفاية، وأبويا جرح ناس كتير وأولهم أخوه عماد الله يرحمه”. 

وأكدت أن أصعب لحظة في حياتها هى وفاة أختها غنوة، واصفة إياها بأنها اللحظة الأصعب على الإطلاق. 

وتابعت: كانت أصعب لحظة في حياتي على الإطلاق، خبطة كبيرة وقاسية جدا، مع إن علاقتنا مكانتش كويسة، لكن مكنتش عايزه أصدق خالص لحد ما أنا غسلتها بإيدي وكنت عايزه أصحيها. 

وأضافت: كان موقفا قاسيا جدًا مبحبش أدافع عن نفسي، ولا أتكلم عن حد مش موجود، لكن كل اللي أقدر أقوله بمنتهى الأمانة وبيني وبين ربنا عمري ما كنت سبب زعلها مني أو إن يبقى فيه بينا مشكلة، دي كانت بنتي مش أختي، والفرق بيني وبينها 16 سنة. 

وواصلت: هى عندها أسبابها الله يرحمها، ممكن لو عمرها طال شوية كانت الأمور تتغير وتعذرني، لكن ملقتش حد حنن قلبها، هما قسوا قلبها. 

وقالت أنغام: “أول حاجة وحشتيني جدا، وحشتني غنوة بنتي الصغيرة اللي كنت بسرح لها شعرها وأحميها في حضني تحت الدش، وياسين أحلى حاجة سابتها في الدنيا، سابتلي نعمة وهدية كبيرة وحتة من قلبها، وهو في عينيا”. 

تحدثت أنغام خلال اللقاء عن تجربة طلاقها أكثر من مرة قائلة: “مش هقول إني أنا الغلطانة في الطلاق ولا هو الغلطان، لكن أنا عملت اللي أقدر عليه، ومقدمتش شخصية مختلفة عن شخصيتي، يمكن هما ادعوا شخصيات غير اللي انتهينا بيها، وأكيد أنا بنجذب للرجالة الغلط”. 

وتابعت: “أني كتير بدي اللي قدامي حق لا يستحقه أو حجم مش حقيقته، وبحاول أكبره جنبي وده مش صح، وبعترف إني مكنتش حذرة ومعنديش المقومات ومش هحب مرة ثانية، أنا مش حمل أذية”.