أميرة فاروق تكتب : عرفنا والمعرفة بداية
عرفنا ايه اللي أذانا وإحنا صغيرين وبقينا عارفين تصرفاتنا الحالية ناتجه عن ايه
وعرفنا أن الطاعة العمياء للأهل حاجه مش صح لإنها بتلغي الشخصية وبتخلط أزمنة مش متشابهه في بعض
وعرفنا إن في اهالي بتدوس علي ولادها مستخدمين الدين الي بيعظمهم ويخوف الي يفكر يعترض عليهم
عرفنا إن شيوخ الدين استخدموه ضدنا لصالح تطلعاتهم واوهامهم المريضة واتأكدنا إننا لو شغلنا دماغنا واتحررنا من كورس الدين المكثف الي حشوا بيه دماغنا مش هنتحرق ولا حاجة
عرفنا إننا لما بنلتزم بنتأذي بأسم الإختبارات ولما بنخطئ بنتأذي بأسم العقاب
عرفنا إن الدين مش لله والوطن للحكومات
وعرفنا إننا منقدرش نعترض في بلدنا او نبدي رأينا
وعرفنا كمان إننا اتجهلنا عن عمد واتحدد مستوي معيشتنا مُسبقاً
عرفنا إن فكرة الزواج فاشلة بيتسرق فيها عُمرنا بأسم الطاعة والدين وبأسم خوفنا المرضي علي ولادنا
عرفنا إننا لو عايزين نعيش في رفاهية ونبقي اثرياء مُجبرين نبدأ غلط نبيع جسمنا او دماغنا وبعدها نقرر نتوب أو نكمل
عرفنا إن امراضنا النفسية ساهم فيها مجتمع بالكامل وعرفنا إن صحتنا مش ملكنا لو مشربناش مخدرات هندخن ولو مدخناش فااحنا عايشين وسط ناس بتدخن في بيئة ملوثة بالكامل
عرفنا إن في بلاد مش بتدخلها مخدرات وعرفنا إن الممنوعات تجارة تساهم في اقتصاد بلدنا ومسموح لنا نشتريها ونتعاطاها بس في الخفاء وإلا نتسجن
عرفنا إن السجون مش تهذيب وتأهيل بل إذلال وتنكيل
عرفنا إن مصلحة السجون تكتسب وتتاجر بالجرائم والمساجين وأهاليهم
عرفنا إن حرية التصرف في الجسد مكفولة فقط للأثرياء والي معهوش يا يغتصب يا يتحرش يا يسرق يا يتداين ويتحبس .
عرفنا والمعرفة بداية
