أسرة الزميل كريم إبراهيم تُطالب بإخلاء سبيله بعد عام و6 أشهر في الحبس الاحتياطي: اتكلموا عنه.. يستحق يعيش حياته ويكملها طبيعي

اشتغل مذيع نشرة أخبار بالبوابة نيوز في ٢٠١٧ وعنده انتماء غير عادي لبلده زيه زي أي مواطن بيحب بلده تكون في أفضل حال  

كتبت: ليلى فريد  

طالبت أسرة الزميل كريم إبراهيم، عضو نقابة الصحفيين، بإخلاء سبيله بعد أكثر من عام ونصف في الحبس الاحتياطي على ذمة القضية 569. 

وقالت أسرته في رسالة حصلت (درب) على نسخة منها: “كريم طول عمره شاب مجتهد وكان بيحلم دايما يوصل، للحاجة اللي بيتمنها وهي الصحافة وأنه يكون مذيع نشرة أخبار لحد ما ربنا كرمه بمجهوده ووصل للحاجه اللي كان بيتمنها”. 

وتابعت: اشتغل مذيع نشرة أخبار في البوابة نيوز في ٢٠١٧، وبعدها دخل النقابة وبقي عضو إخراج صحفي، وكان هو اللي بيجتهد ويعمل إعداد النشرة، كل حاجة بمجهوده هو ومكنش بيحب يعتمد على حد وكان بيحب دايما يقول أخبار تهم بلده لأنه بيحبها وعنده انتماء غير عادي ليها زيه زاي أي مواطن مصري بيحب بلده تكون في أفضل حال.  

وأضافت: نشرة الأخبار بتعته اللي كان بيقدمها ويعدها تشهد بكده وأخلاقه في شغله تشهد بكده إنه إنسان مثقف على قدر عالي، ومالوش أي انتماء سياسي، كريم مش عايز حاجة غير إنه يبقي حر زي ما كان عايش، ويشتغل الشغل اللي بيحبه ومجتهد فيه، كريم طول عمره شاب خلوق وبيحب الخير لكل الناس حتى اللي ميعرفهاش. 

واختتمت الأسرة: كل اللي بتمناه إنه يخلي سبيله من تهمة هو فيها بقاله سنتين و٦شهور، هو جوه ليه وعشان إيه أرجو اني تتكلمو عن كريم، كريم يستحق يعيش حياته ويكمل حياته طبيعي.