أتمنى يكون حد سامع معاناتنا| زوجة الزميل الصحفي كريم إبراهيم: طلب علاجات للبرد والمعدة خلال جلسة التجديد.. إحنا بنتدمر
بقاله 730 يوم وليلة في السجن ما بين تجديدات و 6شهور اختفاء يعني ثلاثة سنين من عمره قضهم فى السجن بدون وجه حق!
كتب – أحمد سلامة
قالت جيجي إبراهيم، زوجة الزميل الصحفي كريم إبراهيم، إن زوجها طلب علاجات للبرد والمعدة خلال جلسة تجديد حبسه التي عُقدت اليوم.
وقالت جيجي إبراهيم “أبلغنا المحامي مختار منير، بالوضع الصحي لـ كريم ونقل سلامه لينا وطمنا عليه الحمدلله، وطلب علاجات للبرد وللمعدة وطلب حواله للبريد”.
وأضافت “كريم تعبان ومحتاج الرعاية التامة، كريم معدته مش بتستحمل أي حاجة، بجد كفايه كده عليه لحد إمتى هيفضل جوه، إمتى هتخرجوا كريم وخاصه إننا مش بنشوفه، هو المفروض يقضي حياته وسنين شبابه جوه السجن؟!”.
وتابعت “هنفضل منشفهوش ونفسيته تتعب أكتر هو أكيد محتاج إنه حتى يشوفنا عشان يكون على الأقل مطمن أكتر إننا جنبه، حتى الأكل بقى ممنوع في الزيارة اللي هو أبسط حقوقه! حتى كتير عليا أنا ووالدته إننا نشوفه، بجد إحنا متدمرين من غيره هنفضل نعافر حتى في إننا نشوفه ولو لمرة طوال السنتين واكتر ومش بطمن عليه غير من خلال المحامي كل فتره الـ ٤٥يوم بتاعت التجديدات المشورة”.
وأردفت “كريم بقاله 730 يوم وليلة في السجن ما بين التجديدات وغير الـ 6شهور اختفاء قسري يعني ثلاثة سنين من عمره قضاهم فى السجن بدون وجه حق! بتمني يكون حد سامع المعاناه اللي هو وإحنا فيها.. ومن كل قلبي بتمنى خروجه في أقرب وقت وإنه يكون وسط إخلاءات السبيل لقوائم لجنه العفو، بطالب لجنة العفو بمساعده كريم في خروجه وإنه يكون حر”.
وألقت قوات الأمن القبض على إبراهيم في 14 ابريل 2020 عقب وقوع حادث منطقة الأميرية الذي شهد تبادلا لإطلاق النار بين قوات الأمن وعناصر إرهابية، خاصة وأن كريم يسكن نفس المنطقة التي شهدت الحادث.
وظهر إبراهيم بعد عدة أشهر من القبض عليه في مقر نيابة أمن الدولة العليا، التي حققت معه في القضية المشار إليها وقررت حبسه 15 يوما احتياطيا منذ ذلك الحين ويتم التجديد له بشكل دوري. ويواجه كريم اتهامات ببث ونشر وإذاعة أخبار وبيانات كاذبة، إساءة استخدام وسيلة من وسائل التواصل الاجتماعي “فيسبوك”، ومشاركة جماعة إرهابية مع العلم والترويج لأغراضها.
