في ذكرى استشهاد عبد المنعم رياض نُعيد نشر قصيدة رثاء فؤاد حداد له: الدمع نوَّر بالشرف والعزة
تحل اليوم ذكرى استشهاد الفريق أول عبد المنعم رياض، والذى استشهد على جبهة القتال أثناء حرب الاستنزاف فى 9 مارس عام 1969، بعدما كتب صفحات مضيئة في تاريخ العسكرية المصرية، حيث تم اختيار يوم استشهاده ليكون احتفالا سنويًا بيوم الشهيد.
في ذكرى رحيل عبد المنعم رياض نعيد نشر قصيدة الشاعر الكبير فؤاد حداد في رثاء رياض.
يا سامعين أبناء بلد واحدة
تحت السما الواحدة أدان المعارك
وتعيشي يا مصر عمري ما أنسى نهارك
واحد وعشرين شهر بعد يوم تسعة يونيه
الدمع نوَّر بالشرف والعزة
والحزن نوَّر في صميم القلب
عبد المنعم رياض
أكتر من أم وأب
لسه الحياة مبدأها
ما تبتسملكش إلا من شهداءها
كل النوبات والورادي اللي بتعرقها
حيعرفوها ولادك لما يستشهد
عبد المنعم رياض
أكتر من أم وأب
يا كلنا ولاد العطش والنيل
وكلنا بنحتاج لكلمة حق
والنور ياخدنا بإيده في الأيام
المعركة طلعت لفوق الجدود
والتضحيات فيها الرغيف والخلود
والدم الأحمر والضنا مولود
والشمس ما تبطلش فجر وعرق
وكل يوم عن كل يوم افترق
حيلتقوا ساعة ما يجمعنا
عبد المنعم رياض
أكتر من أم وأب
يا كل يوم من بُكره وامبارح
وسؤال ورد البيت مع الشارع
الشعب من راجل لطفل بيعرف
ياما في جميع السن والأعمار
خضعت ليالي لشرع الاستعمار
الشعب يعرف مصر وفلسطين
يعرف منارة يولية بين السنين
ومهاجرين في الله مع الأنصار
والشعب يعرف من تاريخه الليل
والشعب يعرف من تاريخه النهار
والشعب يسقي الأرض يعرف مقام
القمح والحرية بين الشجر
والشعب يقرا في الجبين والحجر
كل المعاني أصبحت إنسان
عبد المنعم رياض
أكتر من أم وأب
الدمعة نزلت والميدان انفجر
ما أعظمك يا مصر
لما لهدف واحد تصب العيون
والصوت يلبي والأيادي معاه
عبد المنعم رياض
أكتر من أم وأب
أكتر من أم وأب معنى الآه
في أوجع الأيام وأرحمها
في شعب مصري من حنانه وشقاه
كان يبكي لما يشوف بأمر الحياة
إيد اليتيمة قربت لطعامها
نغالب الدنيا ونحفر ظلامها
لو تفزع النسمة نِحِسّ القدر
نعرف ميعادنا في المهالك حضر
شرع الكرامة شرع الاستشهاد
ننهض مع الأرض اللي تولد رياض
ونمشي بالرقبة اللي فيها التار
ما نتلفتش
نطلع على شط القنال التاني
طالع على شط القنال التاني
قال للسما والأرض انتي الباقية
ولكل حبة خير يا أمي الغالية
وللشهادة يا وطن أوطاني
أول سلامه من عينيه الهادية
يعرف وراه الطيبين والدار
ويطفّي من قلبه البلد والساقية
ما يشوفش يوم قدامه إلا التار
القنطرة الشرقية والصقّالة
يقولوا تُبت في البنا والحرب
اعرف بحقدك بهجة الرجالة
واسمع رصاصك زي طير ينحب
الزرع نوَّر لما ابنك شافك
والشمس طلعت لما جرحك لم
أنت الأصيل لازم تشيل بكتافك
ما ينكتبش التار بغير الدم
امشي الليالي في الظلام الطارئ
يا مصري خالد في العرق والنور
تكتب وتقرا على الجبين الصادق
كل اللي يختار الشقا منصور
كان رياض فارس مجاهد
السلاح والقلب واحد
في عيون الشعب خالد
كل أيامنا رياض
كان رياض أُمَّة كريمة
نوَّرت فيها العزيمة
لأجل ذكراه الرحيمة
كل أيامنا رياض
كان رياض دمعة في قلبه
يعرف الحق اللي طالبه
إحنا طول الليل نصاحبه
كل أيامنا رياض
كان رياض عايش حياته
بالعرق يسقي نباته
مبدأ الإنسان تباته
كل أيامنا رياض
كان رياض دايماً يفكر
في النبات ازاي بيكبر
احضنوا القطن المنوَّر
كل أيامنا رياض.
