«فلوس الأندية ملك الشعب».. ميدو يطالب بإجبار الأندية المصرية على وضع سقف لرواتب اللاعبين.. انظروا إلى تجربة كرول

كتب – طاهر محمد

هاجم الإعلامي الرياضي أحمد حسام ميدو مسؤولي الأندية الذين يدفعون رواتب ضخمة للاعبين، رغم إمكانياتهم المحدودة.
وقال ميدو في تصريحاته عبر برنامج “الريمونتادا” على قناة “المحور”: “لاعيب بيبقى واخد في نادي مليون جنيه، فجأة بياخد في مصر 17 أو 18 مليون، الطفرة دي هتخليه يجيله هزة وخبل مهما كان اسمه هزة تساهم في تراجع مستواه”.
وأضاف: “فلوس الأندية اللي مش خاصة الفلوس دي ملك الشعب، لازم جزء من الميزانية يتم تخصيصه لتطوير الناشئين وتطوير اللاعبين، والتطوير مش كلمة وخلاص، لازم يكون في حلول على أرض الواقع”.
وشدد على أنه يوجد “مشكلة في تقييم اللاعيبة في مصر، ومبقاش عندنا لاعيبة كافية في مستويات عالية”
وطالب ميدو بإجبار الأندية المصرية على وضع سقف رواتب خاص للاعبين، حيث قال: “لازم يتحط سقف لرواتب اللاعيبة ويتم إجبار الأندية على تخصيص جزء من الميزانية الخاصة بيها، للصرف على الناشئين، وكذلك المدربين وتطويرهم، وتحسين الملاعب”.
.أضاف: “رود كرول من أفضل الناس اللي اشتغلت في مصر، راح يلف المحافظات يدور على المواهب ومنهم أحمد حسن وعلي ماهر وحازم إمام وابتدا يعمل للاعيبة دي معسكرات في المركز الأولمبي في المعادي وكانوا عايشين هناك، وطلع منهم 10 لاعيبة جامدين مثلوا منتخب مصر 10 سنين” .
وختم حديثه قائلا: “تطوير الكورة في مصر لازم يجي من التطوير، ورسالتي الإعلامية بتخليني لازم أقول الكلام ده”.