صور: زوجة الزميل سيد عبد اللاه في رسالة له عبر درب: موجوعة قوي.. تاني عيد بطعم المرار في غيابك.. فرجه قريب يا حبيبي

مروان لما شافني بأبكي بعد التجديد الأخير مسح دموعي وعينيه مليانة دموع وقاللي: بابا مش هيجي العيد ده كمان.. واياد حضني وقال بابي وحشني اوي

مروان من حزنه رافض يرجع المدرسة بيقوللي هستني بابي فالبيت علشان لما يرجع افتحله الباب بسرعة واحضنه وأبوسه وأنام فحضنه

حبيبي كل سنة وأنت طيب مع إني متأكدة إنك استحاله هتحس بعيد طول ما أنت في زنزانة بعيد عن ولادك.. فرجه قريب

كتب – فارس فكري

قالت أمنية فوزي زوجة الزميل السيد عبد اللاه المحبوس منذ سبتمر الماضي إن هذا ثان عيد بطعم المرار والألم في غياب زوجها.

وأضافت في رسالة له بمناسبة عيد الأضحى عبر “درب” على خلفية تجديد حبسه قبل يومين: أنا موجوعة أوي إحنا أسرة مدمرة، أطفال مكسورين محرومين من أبوهم لكن ربنا فرجه قريب وترجع لأولادك.

وقالت أمنية في رسالتها: تاني عيد بطعم المرار والألم، أطفال بدل ما يحتفلوا بالعيد واللبس الجديد منهارين، مروان ابن الـ٦ سنوات أول ماسمع قرار التجديد قبل العيد بيومين لما دخل عليا وشافني ببكي بانهيار مسح دموعي وهو عينيه مليانه بالدموع وقاللي يعني بابي مش هيجي العيد ده كمان وهز راسه بألم وحزن وانكسار.. واياد حضني جامد وقاللي بابي وحشني اوي نفسي اشوفه هو ليه مش عايز يجي هو مش بيحبني… أما آسر للأسف مايعرفش شكل سيد اتقبض عليه وهو ٩ شهور وهو دلوقتي سنة و٧ شهور قمة الوجع…

إحنا أسرة مدمرة، أطفال محطمة مكسورة محرومين من أبوهم فحياته.. إياد داخل المدرسة السنة دي في غياب باباه… ومروان من حزنه رافض يرجع المدرسة بيقوللي هستني بابي فالبيت علشان لما يرجع افتحله الباب بسرعة وأجرى احضنه وأبوسه وأنام فحضنه.

حرام رفقا بأطفال نسيوا يعني ايه عيد ويعني ايه فرحة

حبيبي كل سنة وأنت طيب مع إني متأكدة إنك استحاله هتحس بعيد طول ما أنت في زنزانة بعيد عن ولادك. وإن شاء الله فرجه قريب وهنفرح قريب اوي وترجع لحضن ولادك

زوجتك

أمنية فوزي

كانت قوات الأمن قد ألقت القبض على الزميل الصحفي السيد عبد اللاه من منزله بعد تغطيته لمظاهرات 20 سبتمبر في محافظة السويس، وتم إدراجه على القضية رقم 1338 لسنة 2019 حصر أمن دولة عليا، وكان آخر تجديد له قبل يومين لمدة 45 يوما أخرى.

ويواجه سيد في القضية، اتهامات بمشاركة جماعة إرهابية مع العلم والترويج لأغراضها، وإساءة استخدام وسيلة من وسائل التواصل الاجتماعي، نشر أخبار وبيانات كاذبة، وأخيرا التظاهر والتجمهر بدون تصريح.