زوجة الزميل سيد عبداللاه: أولادي فقدوا الأمل في أن والدهم على قيد الحياة وابني شاف صورته قال “الله يرحمه”.. كفاية وجع قلب

كتب – أحمد سلامة

قالت الزميلة أمنية فوزي، زوجة الزميل الصحفي المحبوس سيد عبداللاه، إن أولادها يمرون بحالة نفسية غاية في السوء على خلفية استمرار حبس والدهم.

وأضافت، في تصريح لـ”درب”، “أوضاعنا تزداد سوءًا، أولادي وصل بيهم الاعتقاد إن والدهم ليس على قيد الحياة، وابنه شاف صورته قال (الله يرحمه)”.

وتابعت “إياد ابني كان بتكلم على زينة شهر رمضان، وقال لي (الناس كلها عندها زينة علشان عندها بابي.. لكن إحنا مش عندنا).. أنا وصلت الرسالة دي لسيد في محبسه وهو رد عليا في رسالة قال فيها (أنا كل همي إني اطلع لولادي آخدهم في حضني، دا كل همي لأن رمضان اللي فات كان الأسوأ”.

واستكملت “سيد مبينزلش جلسات، الموضوع متعتم عليه تماما ومش عارفين هينزل امتى، ومش عارفين إيه اللي ممكن يحصل من يوم 29 نوفمبر 2020 يوم التدوير على ذمة القضية الثانية بعد إخلاء سبيله”

وفي رد على سؤال عن أوضاع الزميل سيد عبداللاه داخل محبسه، قالت أمنية فوزي “سيد بيعاني من حالة اكتئاب شديد جدا، وبيعاني جسديا من تدمير في الأطراف بسبب إصابته بـ(عرق نسا)، لكن أكثر ما يؤلمه هو بُعده عن أولاده”.

وأردفت “لصالح مين يتم تنشئة أطفال على كره البلد، أولادي شافوا أبوهم وهو بيتقبض عليه، كانوا بيتحاموا فيه من الرجال اللي اقتحموا منزلنا.. والنهاردة محرومين من أبوهم بشكل كامل.. مش دا اللي انا كنت عايزه أربي أولادي عليه، كنت بربيهم على حب البلد”.

وناشدت زوجة الصحفي سيد عبداللاه جميع المسئولين التدخل من أجل وضع حد لمعاناة أسرتها “بستغيث بكل من لهم يد في مكوث زوجي في السجن، ارفعوا أيدكم عنه.. سيد مش إرهابي ولم ينتمي لأي تيارات دينية وعمره ما كان ضد بلده.. كفاية وجع قلب لحد كدا”.

كانت الزميلة أمنية فوزي، زوجة الزميل سيد عبداللاه، قد روت تفاصيل زيارتها له في السجن وحكاية أول لقاء له مع ابنه آسر في عيد ميلاده الثاني، مشيرة إلى أنه لم ير آسر منذ كان عمره 9 شهور.

وقالت أمنية في تصريحات سابقة لـ”درب”، “خلصت زيارة، الحمد لله ربع الزيارة بس اللي دخل وكله رجع بالرغم من توسلاتي ليهم يدخلوا باقي الزيارة لكن للأسف بلا جدوى، قلتلهم ده لسه جاي تدوير وأول زيارة ليه يعني أنا بأسس من أول وجديد لكن برضه مافيش فايدة”.

وتابعت “كل ده رجع.. الملاية والدفاية والمشروبات والجبن والتوابل وأدوات الحلاقة كلها ومعجون الأسنان والليفة والشاور والراديو والكلونيا والبرفيوم والمزيل واللب والسوداني والكورن فليكس والشوفان، والبونبوني وكشكول.. مع اني قولت ده خرج واتدور ومعندوش أي حاجة”

وأضافت أمنية لـ”درب”، “دخلت و زي كل مرة سيد هو اللي إداني الأمل والقوة إني أكمل.. وأحلى مافي الزيارة كان إبننا آسر، دي أول مرة يزور سيد وكنت حاطه إيدي على قلبي ليكسف سيد ويرفض يسلم عليه، وخصوصا أن النهاردة عيد ميلاد آسر التاني، وكان لازم يشوف سيد ويكون في حضنه آسر أول ماشاف سيد بالرغم من انه مايعرفوش الا انه حضنه حضن كبير أوي وفضل بيبص لملامحه وأخيرا ناااام نوم عميق في حضنه”.

واختتمت أمنية: “حبيبي حس بسيد، حس بالأمان اللي مفتقده من عمر ٩ شهور يوم ما اتقبض على سيد، إن شاء الله هتفرح قريب ياشريك عمري وهترجع الضحكة تاني”.

وفي وقت سابق قالت الزميلة أمنية فوزي، إن محكمة الجنايات، قررت تجديد التدابير الاحترازية المفروضة عليه مقابل إخلاء سبيله، لمدة 45 يوما، مشيرة إلى حضور المحامية هدى عبد الوهاب معه الجلسة.

جاء ذلك على ذمة القضية رقم 1338 لسنة 2019 حصر أمن دولة عليا، والمعروفة إعلاميا باسم (قضية أحداث 20 سبتمبر 2019)، والتي يقضي بسببها سيد عبداللاه حبسه الاحتياطي، والمفارقة أن ذلك يأتي فيما جرى تدويره على ذمة قضية جديدة بعد إخلاء سبيله في القضية الأولى، والمحبوس على ذمتها منذ إخلاء سبيله في القضية الأولى.

ويواجه عبد اللاه في القضية، اتهامات ببث وإذاعة ونشر أخبار وبيانات كاذبة، إساءة استخدام وسائل التواصل الاجتماعي (فيس بوك)، ومشاركة جماعة إرهابية مع العلم والترويج لأغراضها.