البرلمان يطالب الحكومة بإحصاء حول المستأجرين.. ونائب يرفض مشروع قانون الايجار القديم: عقاب اجتماعي  

إمام: كرسي الوزارة زي كرسي الحلاق بييجي يوم يقولك نعيما واللي عليه الدور يتفضل 

كتبت: ليلى فريد وصحف  

طالب المستشار حنفي جبالي، رئيس مجلس النواب، الحكومة بتقديم بيان إحصائي عن عدد المستأجرين الأصليين. 

بدوره أعلن النائب عبدالمنعم إمام، أمين سر لجنة الخطة والموازنة بمجلس النواب، خلال الجلسة العامة اليوم الاثنين، رفضه لمشروع قانون الايجار القديم. 

وقال النائب مشروع تعديل الإيجار القديم المقدم من الحكومة عقابًا اجتماعيًا، إن كنا للعدل طالبين فالرحمة قبل العدل نبغيها، أنا مالك عندنا مكان إيجار قديم جدي ووالدي أجروا الشقق وعارفين وقالوا لنا إنها ستورث. 

وتابع: الحاج محمود اللي أجر مننا سنة 1990 راجل موظف محترم، طلع معاش عمره 73 سنة، يطلع بعد 7 سنين بموجب المشروع ده، مش كل الورثة، زيي أنا كده بقوله تموت قبل السبع سنين. 

وأضاف: واحد زيه في مدينة المحلة الكبرى، مدينة زي بورسعيد أوغيرها من المدن ليس لها ظهير صحراوي توديهم فين هتبعتهم مدن تانية، ولا هتوديهم الصحرا، هذا القانون في ذكرى 30 يونيو بدل ما نصحح خطأ تاريخي نعمل عقاب اجتماعي، ونقول للناس تموتوا قبل السبع سنين أو تطردوا في الشارع. 

وقال النائب: اللي بيحصل ده غلط محتاج وقفة بنولع في الناس نقولهم احنا مش معاكم ونقول لكبار السن أن المجلس ده اللي طلع قانون المسنين والحكومة ما طلعتش لائحته، كفاية عليكم كده.  

وتابع: نقيب الأطباء تكلم عن العيادات والصيدليات أنا هتكلم عن الحلاقين، كرسي الوزارة زي كرسي الحلاق بييجي يوم يقولك نعيما واللي عليه الدور يتفضل، السيرة الطيبة هي الباقية.