هاني شاكر: نسقنا مع جهات عليا حول منع مطربي المهرجانات.. ودلوقتي الولاد دول كتروا لأنه بقى موجة الشباب بيحبوها ومنتشرة

كتب: عبد الرحمن بدر

قال الفنان هاني شاكر، نقيب المهن الموسيقية، إن النقابة نسقت مع جهات عديدة في الدولة حول قراراتها ضد مطربي المهرجانات، موضحا: “التنسيق مع المصنفات الفنية على أكمل وجه، التنسيق مع القاعات العرض في كل مصر على أكمل وجه، وأه في تنسيق مع جهات أخرى أعلى بالدولة”.

وأضاف شاكر، في مداخلة هاتفية مع الدكتور معتز عبد الفتاح مقدم برنامج “تحت الشمس” عبر قناة “الشمس”: “الباب مفتوح مع مطربي المهرجانات اللي هيحاولوا يصلحوا من نفسهم ويقدموا حاجة جميلة ويكونوا صالحين أساسا يكونوا مطربين.. حمو بيكا إحنا اديناله مدرس على حساب النقابة كان بيعلمه، وإحنا لا نتقاعس مع أحد، لكن في ناس ربنا لم يمنحهم الموهبة، والموهبة مش بالعافية”.

وتابع: “اللي يقف على المسرح لازم يكون عضو نقابي ويزاول المهنة، مش أي حد يقول أي حاجة، والنقابة هتفضل دايما تقف مع أعضائها، وبالنسبة للناس اللي مش أعضاء بنقول للي عايز يتقدم للاختبارات يتفضل، والحمد لله إن ربنا جعلني سبب لفرحة الناس وتنقية الأجواء الغنائية في مصر”.

ورد هاني شاكر، نقيب المهن الموسيقية، على إمكانية تأسيس شعبة لمطربي المهرجانات داخل النقابة مثل مطربي الراب.

وقال شاكر: “الراب له شعبة في النقابة من زمان مش من دلوقتي خالص، ودلوقتي الولاد دول كتروا لأنه بقى موجة من الموجات الفنية اللي الشباب بيحبوها ومنتشرة، وأنا وزملائي في المجلس أن كل من ينجح في هذه الشعبة يمضي تعهد على الالتزام بكل ما يقوله أو يصوره، والمخالف يسحب منه التصريح”.

أضاف: “بالنسبة للمهرجانات، المهرجانات مشكلتها إنها معتمدة على الإسفاف والخروج عن المألوف وعدم الالتزام بالقيم والعادات والتقاليد، هما مش بيقولوا غير الكلام اللي يلفت النظر، هما مش معاهم لا فرقة ولا مزيكا ولا أي حاجة إلا الإيقاع والكلام الملفت للنظر، وللأسف الكلام دايما بيبقى خارج”.

تابع: “للأسف معظم بتوع المهرجانات فعلا مش بيعرفوا يغنوا ولا يؤدوا حتى، دول ملهمش علاقة بالغناء، هو الغناء بالعافية؟ أنا عايز أبقى دكتور هبقى دكتور بالعافية؟ عايز أبقى رسام هبقى رسام بالعافية؟ أكيد لأ”.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *